Lider di AVP, Mike Eman y su fraccion, sigui pa e parlamentarionan di MAS y Accion21, a dicidi di no participa den e tratamento di e ley pa presupuesto 2023. Misha a splica pakico, den su opinion, e escogencia di AVP, MAS y Accion21 pa no nan como parlamentario ta representa.
A entrega e concepto di ley pa presupuesto 2023 na College Aruba financieel toezicht (CAft) y Raad van Advies (R.v.A.) na respectivamente juni y juli 2022. CAFT y Raad van Advies a duna conseho riba e concepto. E tempo ey, parti di e prognostico di entrada tawata basa riba introduccion di BTW. Mientrastanto gobierno a dicidi di no introduci BTW na 2023, y na luga di esey ta premira un aumento di BBO pa yega na un nivel di entrada similar. Segun lider di AVP, Mike Eman, lider di MAS, Marisol Lopez- Tromp y Miguel Mansur di Accion21, Gobierno mester a manda e concepto adapta pa CAft y Raad van Advies pa un di dos conseho, prome cu mand’e pa Parlamento.
Gobierno a contesta e peticion aki cu argumentacionnan huridico, incluyendo e insinuacion eroneo di AVP, MAS y Accion21 cu un conseho di CAft ta obligatorio den e fase en cuestion y e argumentonan relaciona cu e meta di un presupuesto y cumplimento cu nos Constitucion. Tambe a mustra riba e punto cu e tratamento di sea introduccion di BTW of un aumento di BBO ta tuma luga ora di trata e ley di introduccion di BTW of e ley pa aumenta BBO, y no ora di trata un presupuesto.
Mas aleu, e parlamentario a sigui bisa cu no ta su intencion pa haci esaki solamente un discusion huridico. Por sigui discuti si a pesar cu no tin un obligacion legal pa bolbe manda un concepto pa Raad van Advies bou di e circunstancianan aki, cu Gobierno ta ‘liber’ pa haci esey. Of si huridicamente ta mas prudente pa manda un concepto adapta pa Raad van Advies ora a cambia e base di un parti di e prognostico di entradanan di un presupuesto. Loke si por bisa, ta cu como parlamentario bo tin e deber di eherce bo funcion y no core pa bo trabou paso bo no ta haya bo kier riba un proceso.
Na momento cu Parlamento yega na e tratamento publico di e ley di presupuesto 2023, ta na e parlamentario pa eherce nan funcion di control, eherce nan budgetrecht y tambe eherce e funcion di co-legislador, door di participa activamente na e tratamento publico di presupuesto 2023. Pero tambe pa haci pregunta, busca clarificacion, cuestiona e maneho, presenta solucion y vota sea pro of contra. Tambe por entrega amienda y mocion. Ademas, por vota riba amienda y mocion entrega door di otro parlamentario.
Cu Raad van Advies a duna conseho riba un concepto cu un prognostico parcial basa riba BTW na luga di BBO, no ta significa cu un parlamentario no tin suficiente informacion pa trata un ley. Ironicamente, pa presupuesto 2022, fraccionnan di AVP y Accion21 a entrega un ‘presupuesto alternativo’ den forma di un amienda entrega pa votacion, sin haya pregunta, sin bay Caft y sin bay Raad van Advies.
Na luga di representa pueblo door di eherce e trabou parlamentario, AVP, MAS y Accion21 a dicidi di bandona sala ora di tratamento di e ley den reunion publico. Esaki no ta e manera cu lo sirbi e pueblo miho, den su representacion den Parlamento. C’un oposicion asina, un democracia no por funciona optimalmente. Excluyendo bo mes for di participacion y influencia como parlamentario, ta un falta di respet pa e voto di e ciudadano.
Fraccion di RAIZ a prepara pa e tratamento di presupuesto. Nan a manda pregunta den e verslag di Staten, y lo participa activamente den e tratamento publico. Asina nan ta eherce e tarea di control, eherce parti di e budgetrecht, y nan funcion como co-legislador, representando e pueblo di Aruba.
