No ta un secreto cu a elimina un ley na 2008 cu a mara e man di e Polisnan pa por controla riba caya. Sigur ora di topa hendenan sospechoso no por a acercanan y pidi pa documento. Esey a pone tambe cu e cantidad di entre otro illegal riba caya a bira masha hopi.
Na dado momento solamente Warda Nos Costa tabata tin e poder pa drenta negoshinan of area laboral pa controla documento di esnan cu ta trahando. Varios biaha Polis a vocifera e perdida di e ley aki unda hasta a perde como nuebe articulo pa por actua como autoridad. Awor despues cu e siman aki vocero di Polis mes a expresa esaki durante un entrevista, minister di husticia Andin Bikker a anuncia mesora cu e lo bay trece e poder aki bek pa Polis. Den pasado a tene cuenta cu diferente cos pa asina no viola derecho humano tampoco. Ta un ley cu no por mal usa esaki pa persigui hende inocente cada rato. E mester wordo bon usa y Polis mester atende cu e ley seriamente. Sigur un stap positivo si e ley aki bin bek y asina e control riba caya pa elimina entre otro ilegalnan por tuma lugar.
No ta un secreto cu tin hopi illegal na Aruba of hendenan cu ta cana rond indocumenta. E poder aki cu Polis lo bolbe haya ta un yudanza grandi. Esey nifica tambe cu Warda Nos Costa lo ricibi tur e hendenan aki den nan scochi y aki tambe mester mira con lo atende cu e avalancha di hende cu por topa cune riba caya durante e control. Asina mes varios occasion ta mira cu Polis ta controla autonan of otro areanan riba caya y ta haya ilegalnan of indocumenta. Tabata wordo menciona cu e actuacion di Polis ta illegal pasobra nan ta actuando contra ley. Awor cu e ley perdi na 2008 bek den nan poder lo haci e control mas legal pa Polis. Minister di Husticia Andin Bikker a anuncia e cambio aki durante un conferencia di prensa. Vocero di Polis mes a splica cu e documento legal pa e cambio tey masha tempo pa wordo cambia. Huridicamente tur documento ta cla pero ta den man di gobierno pa haci e cambio y asina Polis haya su poder bek.
