Minister di Desaroyo Economico, Ruisandro Cijntje, a haci entrega di un ehemplar di Corsou su Strategia Nacional di Exportacion (NES) na presidente di Banco Central di Corsou y St. Maarten, Richard Doornbosch.
Cu esaki, Ministerio di Desaroyo Economico (MEO) hunto cu Minister Cijntje, a duna inicio na un trayecto pa haci entrega di e Strategia Nacional di Exportacion aki na diferente organisacion y partner strategico. E meta y enfoke di esaki ta, pa alcansa tur nanishi den mesun direccion, pa por logra e vision di e Strategia Nacional di Exportacion cual ta “Corsou, caminda negoshi ta prospera”.
Durante sigur e ultimo 30 añanan, e pilarnan tradicional di nos economia a bin ta sirbi nos pais enormemente. Sinembargo, si nos ke mantene e prosperidad di Corsou, nos mester enfoca pa expande y diversifica e fuentenan di prosperidad. Mas cupo di trabou, crecemento di inversion y diversificacion di nos sector di exportacion; cual na su turno lo refleha bek den e desaroyo di nos economia.
E Strategia Nacional di Exportacion (NES) ta e contesta pa Corsou riba diferente di e retonan aki. E ta un plan di cambio integral dirigi riba e pilarnan nobo pa construi prosperidad; no door di substitui esnan existente, pero netamente complementa esakinan pa asina nos por tin un fundeshi economico mucho mas solido.
Despues di a finalisa e Strategia Nacional di Exportacion na Mei 2022, MEO su enfoke awor ta riba implementacion di esaki den e proximo cinco añanan. Pa e implementacion aki ta un exito, ta rekeri envolvimento di nos tur; for di ministerio, e NVnan di Gobierno, pero tambe e companianan den sector priva. Cada Yiu di Corsou ta hunga un rol importante y por duna un contribucion na e exito di e Strategia Nacional di Exportacion.
