Un biaha mas, nos ta na caminda pa celebra 18 di maart unda ta rindi honor na nos Himno y nos bandera. Diaranson, durante un conferencia di prensa, mr. Xiomara Maduro, Minister di Cultura a devela e logo y slogan nobo “Aruba, orguyo di nos tur.”
E mandatario a indica cu a habri luna cultural den gran forma, cu e Festival Un Canto pa Aruba su Himno y Bandera. E adultonan, pero sigur tambe e hobennan cu a duna tur di nan pa subi e scenario y canta pa nan pais. Un multitud grandi a presencia e festivalnan aki.
Den cuadro di esaki, e mandatario a haci apelacion na tur e radio emisoranan, oa toca e cancionnan aki y tur otro cancion tipico relaciona cu himno y bandera pa trece e pueblo den e ambiente di nos dia nacional.
Lo tin varios actividad na caminda pa celebra nos dia nacional. Un di esaki ta poeta di patria, cual ta tuma luga diahuebs, 7 di maart na Museo Historico Nacional (Fort Zoutman).
No tin nada mas bunita pa por haya e poetanan di nos pais pa declama poesia na honor di nos pais Aruba. Ki orguyo pa wak esunnan cu a nace aki y tambe tur esunnan cu bin y haci di Aruba nan hogar, tin hopi cos pa ta orguyoso di nos pais.
P’esey mes, un invitacion pa bay pa e pueblo, pa yega Fort Zoutman, pa presencia esaki.
Aruba ta un orguyo di nos tur y p’esey hunto cu e Comision Dianan Nacional a hinca un serie di actividad den otro. Tin esunnan di tur aña manera e acto protocolar y tambe e manifestacion cultural.
E aña aki lo pone enfoke special riba nos muchanan di scol.
Ademas, mandatario a expresa cu ta for di chikito mester inculca e amor pa nos simbolonan patrio, e amor pa nos pais, den nos muchanan. Aruba ta un pais cu tur dia di nobo ta brinda nos e oportunidad ta duna nos un cas den su cuna venera. Ban gradicie pa tur loke e ta nifica pa nos cada dia.
Ta e muchanan lo ta esunnan cu lo mester carga nos cultura hib’e dilanti.
Pueblo di Aruba, bin presencia e actividadnan cultural aki.
No lubida: Cultura bo tin cu bib’e pero cu bo participacion, bo ta engrandec’e!
