Ta parce cu minister Geoffrey Wever, di Asuntonan Economico, a pega cu malesa di prome minister kende su frase preferi “mi no sa di esey”. Na dos ocasion den su conferencia di prensa dialuna mainta, e mandatario mester a admiti cu e no ta na altura di e situacion cu comerciantenan ta pasa den dje na Duana na momento di drenta cu nan productonan. Pero e mandatario a bisa cu e no sa di e problema cu comercio tincu Duana.
Tabata luna pasa cu Comerciante Uni Aruba (CUA) a tene un rueda di prensa pa informa comunidad riba e confusion cu tin riba recibo, debi na Duana. E preocupacion riba duane waarde ta algo cu nan a trece den pasado caba. CUA kier haya un aclaracion di Duana riba henter e situacion aki.
Frans Ponson, presidente di CUA, a indica cu e preocupacion riba duane waarde a bin na momento cu nan a mira ora comercio of pueblo di Aruba cumpra algo riba Amazon, Duana semper tabata scrap e prijs cu bo ta paga. Aki Duana ta laga paga e tarifa completo (volle tarief) y nan no tabata acepta e descuento. E preocupacion aki CUA a trece dilanti na 2022.
Den un carta di Duana pa su trahadonan a bisa cu “Duana no ta acepta e rebaho door cu no sa di cua tipo di descuento tabata referi na dje.” Tambe ta poni cu ora ta trata di descuento cu ta bini di online shopping, Duana lo acepta descuento sin specificacion.
Awo den 2024, tin caso tras di caso unda cu por prueba cu Duana no ta aceptando esaki un biaha mas. CUA ta lamenta esaki. Ponson a duna un ehempel unda cu cliente ta cumpra dishwasher cu su prijs tabata na mil shen y a haya esaki na seis shen, e persona ta hay’e ta paga invoerrechten riba mil shen. Esaki ta dobel di e prijs. Esaki ta algo cu ta pasa cu frishider tambe. Ponson a indica cu nan tin tur prueba, hasta riba su VISA y kico e duana waarde ta.
Minister Wever sinembargo a bisa “mi no a haya ningun comunicacion di CUA riba e topico aki. Pero di bo splicacion mi por compronde cu sigur e ta algo cu ta traha negativo,” e mandatario a contesta e reportero di 24ora.com.
Di otro banda e ta kere cu ley ta permiti restitucion. “Pero honestamente mi no ta na altura di e problema.” Esaki tabata palabranan expresa pa Wever.
