“Integridad gubernamental ta un topico cu nos mester por discuti abiertamente, tambe den Conseho di Minister,” esaki ta loke Minister di Transporte, Integridad, Naturalesa y Asuntonan di Adulto Mayor, Ursell Arends ta bisa den un declaracion manda pa prensa.
Durante juli 2023, Conseho di Minister a bay di acuerdo cu un proposicion for di Ministerio di Integridad pa periodicamente tene sesionnan den Conseho di Minister tocante integridad gubernamental. E sesionnan lo tuma luga cada kwartaal. E prome sesion a tuma luga dia 19 di september 2023, hunto cu conseheronan Carlos Guiamo y Ruthlyn Lindor. Despues di un introduccion cortico, e reunion a procede na un forma hopi interactivo.
Durante e mesun reunion den Conseho di Minister tambe a delibera riba algun punto di e concepto pa un codigo di conducta pa minister. E codigo di conducta ta trata un variedad di tema manera nevenfuncties, conflicto di interes, biahe di trabou, con pa anda cu regalonan, y mas.
E siguiente sesion den Conseho di Minister tocante integridad gubernamental ta plania pa december 2023. Pa loke ta trata e concepto pa un codigo di conducta pa minister: lo finalisa esaki a termino corto door di bureau di Minister di Integridad den colaboracion cu Bureau Integriteit Aruba.
