Tanto maneho di desperdicio likido y solido ta cay bao ministerio di naturalesa, segun Minister di Naturalesa, Ursell Arends ta clarifica. Aunke cu DOW ta supervisa su operacion, e maneho ta bao e ministerio di naturalesa.
A traha un comision pa atende pa loke ta trata privatisacion di tur RWZI, tambe cadena di rioolering ta bay tin inversion grandi cu lo mester tuma lugar segun e mandatario. E ta afirma cu e ley a bay caba Raad van Advies te cu bin bek. Aworakinan ta trahando riba e rapport cu unabes cla lo bay parlamento pa tratamento, premirando pa luna di februari esaki tuma luga.
Durante ultimo dianan di 2023, a inverti for di ministerio di naturalesa un suma di poco mas cu 400 mil florin, conhuntamente cu otro instancianan den nos comunidad cu tambe a brinda fondo. A inverti den pomp, den Bio Augmentation pa minimalisa e holor – conforme sentencia di hues tambe den caso di Amsterdam Manor contra pais Aruba.
“Mi mes ta bini for di sector hotelero prome cu mi a bira gobernante, dus mi ta reconoce y biba tambe e impacto cu esaki tin,” segun minister Arends.
PREGUNTANAN DI MARCO BERLIS
Parlamentario Marco Berlis a dirigi un carta na parlamento y minister di Naturalesa relaciona cu e caso di RWZI recientemente. Entre otro a manda puntra gobierno mirando cu Amsterdam Manor a gana caso, cuanto esaki lo costa gobierno y for di cua presupuesto lo saca esaki, for di unda lo saca e placa pa pag’e. Tambe si ta premira cu lo tin mas hotel cu lo lanta caso contra gobierno. Minister Arends ta bisa cu su contestanan e lo haya nan por escrito.
INVERSION DEN RWZI NOBO
Minister Arends ta comenta cu si gobierno cumpli cu su compromiso riba e maneho como tambe inversion cu mester tuma luga den RWZI, e ora ey gobierno no necesariamente mester paga e suma di 10 mil florin pa dia, te cu un total di 250 mil florin. DOW a informa cu tin ekipo nobo y mas cu lo bini bek den funcion, injeccion di Bio Augmentation den e planta y rioolering tambe ta tumando lugar, unda e minister ta bisa cu por wak cu e ta dunando resultado pasobra e holor a minimalisa.
“E solucion ta den porta. Februari mas tarda e RWZI lo ta privatisa pa un compania cu yama AWSS (Aruba Waste Water Sustainable Solutions) cu tin compromiso financiero caba pa inverti den un RWZI completamente nobo.
Pero pa termino corto, lo inverti tambe den un Mobile RWZI, cu por procesa un total di 4500 cube di awa. E planta cu tin lo procesa 4500 cube di awa, lo bin un planta mobil pa procesa un 4500 adicional, y asina acapara tur awa cu yega pa procesa esaki na un nivel di standard internacional. Mientrastanto, segun e mandatario, ta inverti pa desaroya un planta completamente nobo.
A sinta cu gerencia di Amsterdam Manor pa nan ta na altura riba stapnan cu gobierno ta tumando. Minister Arends: “P’ami esaki ta un situacion critico. Mi ta asumi mi responsabilidad cu hopi madurez y sigur brinda confiansa tambe. Na final di dia, ta un biaha bo tin pa gana e respet di otro persona. Mi ta haci’e pa asumi mi responsabilidad cu hopi respet, y garantisa ful sector priva cu lo tuma tur paso necesario pa minimalisa impacto di RWZI riba operacion di nan negoshi pero tambe riba nos economia.”
NO A ATENDE CU ESAKI DESDE 1997
E minister ta bisa cu no por keda tira culpa, pasobra tabata sa caba for di 1997 cu e planta a surpasa su capacidad di carga. “Pero a sigui desaroya y persigui crecemento economico, sin para keto pa atende cu maneho di desperdicio tanto likido y solido.” Awe nos ta confronta cu e situacion aki. Nos tur sa e situacion financiero di pais Aruba. P’esey a sali afo y busca partners cu ta dispuesto – conhuntamente cu gobierno di Aruba yega na solucionnan concreto, y ta eynan nos ta n’e momentonan aki segun minister Arends. “Solucionnan concreto y duradero ta den porta, y lo efectua nan den februari mi ta premira mas tarda.”
Finalmente, a puntra e minister si mester paga e multa di e sentencia, lo bini for di ministerio di Naturalesa. Pa cual el a contesta nos cu “esaki lo mester analisa, pero mi ta haciendo tur e tareanan cu no mester yega asina leu pa paga esakinan.”
