Diasabra anochi Minister Ursell Arends tabatin e placer y honor di celebra hunto cu Organisacion di Pensionado Publico di Aruba (OPPA), 35 aña representando nos adultonan mayor y defendiendo nan interes. No ta un secreto cu e cantidad di adulto mayor den nos comunidad ta creciendo y cu esey comunidad su deber cu nan tambe. Nos tin cu para keto na e adulto mayor cu na momento di yega na e edad di pensioen oficialmente, ta haci e traspaso di un bida den cual a traha y entrega pa su Pais, pa uno unda Pais ta traha y entrega bek na dje. Asina e tin espacio pa disfruta di e frutanan cu e la yuda planta den su comunidad.
Minister Arends a expresa su gratitud profundo na e sirbidornan balente di pueblo cu ta forma parti di OPPA. Un plataforma cu ta aporta na
participacion activo di e grupo importante cu ta nos adultonan mayor. Probechando di e momento festivo, Minister Arends a anuncia cu Conseho di Minister a declara 25 di juli como ‘Dia di Pensionado’, siguiendo e peticion di OPPA y den alineacion cu e vision di Ministerio di Adultonan Mayor.
Aruba asina ta uni tambe na e celebracion hunto cu hermana isla Corsou y Boneiro. Un decision cu segun e minister ta resona
profundamente cu e compromiso pa honra nos adultonan mayor. Na mes momento, minister ta remarca cu e dia ta sirbi como reflexion riba
e hecho cu ainda nos tin gruponan den comunidad, mayoria biaha migrantenan cu nos a invita pa yuda lanta nos Pais, pero cu no por
beneficia di un pensioen, pues Gobierno di Aruba su trabounan pa cu tur nos adultonan mayor pensionado, no ta cla ainda.
Minister Arends ta finalisa enfatisando cu “nos tin e deber na nos mes y na e generacionan cu ta bini despues pa crea un sociedad caminda sabiduria y experiencia di nos adultonan mayor ta sigui wordo aprecia y balora.”
Tocante OPPA
A funda Organisacion di Pensionado Publico di Aruba (OPPA) dia 26 di augustus 1988. Awendia nan tin mas di 1600 miembro activo y nan directiva ta consisti di Ireno “Ivo” Valdes como presidente, Carmen Tromp como vice-presidente, Harry Bareño como tesorero, Duvis Pimienta como secretario, John Bernadina como di dos secertario, Lourdes Tromp como di dos tesorero y Jose Alfredo Capelo como comisario. Meta di OPPA ta pa organisa e pensionadonan publico cu ta biba na Aruba (of cu a yega di biba na Aruba) y asina defende e interesnan di su miembronan. Como un grupo di interes, nos pensionadonan ta haya asina un miho representacion den nos sociedad. pa bira miembro di OPPA bo mester ta cobra un pensioen di Stichting Algemeen Pensioenfonds Aruba (APFA) y tambe esnan cu ta haya un “uitkering bij wijze van pensioen” for di Gobierno di Aruba. Tambe pensionadonan di APC (antes APNA) cu ta biba aki na Aruba.
