Dia 7 di juli 2023 parlamentario di AVP Mervin Wyatt-Ras a dirigi un carta cu diesdos pregunta pa Minister di Husticia y Asunto Social, Rocco Tjon. E preguntanan tabata relaciona cu subsidio n’e Centronan di Bario of buurtcentra.
E parlamentario tabata interesa di haya sa si ta berdad cu e centronan ta bay cay bou di Cede Aruba, pero tambe si nan no ta bay sigui haya subsidio for di gobierno. E Minister di Husticia y Asunto Social a manda un carta bek pa e parlamentario, unda el a contesta su preguntanan riba e Centronan di Bario como Cede Aruba.
Den e contesta e mandatario a splica cu no ta berdad cu lo stop di duna subsidio na e centronan, pero nan a aumenta e subsidio. Pa motibo cu e centronan ta traha cu Cede Aruba pa hopi tempo, a tuma e decision pa e ayudo financiero bay via Cede Aruba.
Tambe el a indica cu pa aña ta duna e ocho centronan hunto e suma di 613.200 florin, pero a aumenta esaki cu 514.400 florin. Esey ta p’e programa di leider. Pero, awo dies Centro di Bario por haci uzo di e suma aki.
Cu e centronan ta cay bou di Cede Aruba, esaki tin di haber cu un plan strategico. Nan a bin cu e programa “Barionan Unico” y den e plan aki e centronan ta hunga un rol importante.
Pa mas informacion por lesa e contesta di e mandatario manda na parlamentario Mervin Wyatt-Ras.
