Durante e conferencia di prensa di Gobierno Minister di Salubridad Publico a papia di e gastonan cu mester reduci den AZV, 5 miyon pa luna. Un decision hopi dificil den e momentonan aki cu tin un crisis di salud, segun e mandatario Dangui Oduber, teniendo cuenta cu e grupo mas vulnerabel.
Den cuadro di esaki Gobierno a institui un comision cu yama “Commissie Zorgtoeslag”, cu ta consisti di AZV, SVb, Departamento di Impuesto, Ministerio di Turismo y Salubridad Publico, Departamento di Asuntonan Social y DWJZ. E tarea ta pa duna conseho na Minister Oduber con pa introduci un “Zorgtoeslag” pa pashentnan den exterior cu ta ricibi 50% menos di daggeld vergoeding, pa e guianan cu a kita e daggeld, transporte pa esnan cu ta wordo cubri mas door di AZV (dialisis) y e contribucion propio.
E intencion ta pa e comision aki entrega den dos siman di tempo un conseho na Gobierno di kende ta e hendenan cu ta bini na remarca pa e “zorgtoeslag”.
Manera cu e mandatario a bisa desde inicio, ta cubri transporte di pashentnan cu ta drumi, rolstoel of esnan cu no por cana. Di tur otro pashent ta spera cu nan ta wordo transporta door di familiar of si nan mes por cana pa nan transporte.
Banda di esaki, AZV y IMSAN ta bay percura pa transporte di pashentnan cu ta biba di un pensioen of bijstand, cu no tin transporte disponibel di un familiar of no por paga pa esaki. Ta bay coordina pa e transporte pa e tratamento di dialisis tuma luga pa e grupo menciona, mientras cu e comision ya menciona ta kedando cla cu su conseho. “Ta importante pa nos tin opvang pa pashentnan afecta pa e decisionnan tuma. E ta situacion fastioso pa Gobierno y AZV, pero simplemente nos ta wordo instrui y obliga, y nos no tin otro opcion. E opcion lo ta un risico cu Hulanda lo a bisa no tin placa pa paga FASE ni Subsidio di Salario, y AZV ta bay hay’e den situacion hopi dificil.”
Segun e mandatario a splica, ta trahando cu e trahadonan social di IMSAN y Hospital, kendenan tin un lista di e pashentnan vulnerabel cu ta bini na remarca pa haya transporte. Personanan cu ta biba nan so , tin pensioen of bijstand y no tin ningun forma pa yega unda nan mester haya e tratamento. Siman pasa caba a haci algun transporte. Ta haci e transportenan aki cu autonan di Gobierno y ambtenaarnan cu tin disponibel. E no ta encera gastonan extra pa presupuesto di Gobierno.
Otro decisionnan
Un otro condicion di Hulanda, pa loke ta gastonan di AZV, ta pa evita manda pashentnan Colombia y haci uzo di hospitalnan na Aruba, Corsou of Sint Maarten. Tambe Hulanda ta prefera pa e paisnan den Reino cumpra remedi hunto p’asina baha e prijs pa remedinan, y miho cooperacion di laboratorionan.
Gobierno di Aruba a bin ta trahando riba e plan aki y lo present’e den e Conseho di Minister di Reino dia 3 di juli awo.
