Minister di Finanza Xiomara Ruiz Maduro durante e conferencia di prensa di Gobierno diamars mainta a anuncia un adaptacion den e ley di BBO. Na januari ultimo a drenta na vigor e decisio cu comerciantenan mester kita BBO for di e recibo y inclui esaki den e prijs di e producto. Den esaki awor a crea un opcion pa comerciantenan, cu tabatin problema cu e sistema aki.
Manera ta conoci, comerciantenan a bin ta critica e hecho cu e mandatario no a consulta cu nan prome cu a tuma e decision aki pa mira e consecuencianan cu esaki por tin pa nan. E luna aki finalmente tabatin un consulta, unda cu diferente sugerencia a bini dilanti for di e comerciantenan.
Despues di e consulta aki, Gobierno a dicidi cu ta permiti e comerciante uza riba su factura kico ta paga na cada componente manera e BBO, BAZV y BAVP.
E mandatario a gradici tur e comerciantenan cu si a aplica e cambionan cu a keda introduci na januari, esta hinca tur e primanan aki den e prijs y no a menciona esakinan den e factura cu ta entrega na e consumidor. A tene na consideracion loke comerciantenan a trece dilanti den e “stakeholder meeting”.
Loading...
Reload document 
Open in new tab Awo despues prome di october, ta permiti nan specifica kico ta paga na cada componente di belasting. Den esaki, e mandatario a splica, a tene cuenta cu interes general y pa tin e transparencia necesario pa e consumidor.
A manda carta pa informa tur gremio, presente na e stakeholder meeting, di e decision tuma door di Gobierno. “A purba tene cuenta cu tur loke a bini dilanti den e reunion cu gremionan pa yega na un decision balansa, cu ta beneficia e consumidor pero teniendo cuenta cu e preocupacion expresa pa comercio.” Ruiz Maduro a agrega cu na Hulanda y Colombia tin e sistema aki, unda cu ta paga of ta pone prijs di e producto, pero tambe ta specifica kico ta paga na e diferente tipo di belastingnan. E transparencia ta mescos cu e sistema na Aruba, el a sigura.
Tin supermercadonan grandi cu a haci e cambionan caba, esta no ta funciona BBO, BAZV y BAVP den e prijs. Pa nan no tin cambio. Nan por sigui haci uzo di e mesun sistema. E cambionan ta bay pa e comerciantenan cu ta haya cu e prijs no ta transparente. “Di e forma aki nos a purba pa tene na consideracion tur locual cu a bini dilanti, e preocupacionnan expresa.”
