Aruba Food & Beverage Association a organisa un foro unda a adresa diferente inkietudnan, entre otro proceso di DIMAS cu ta keda un tema fastioso. Minister di Labor, Glenbert Croes tabata presente. Hopi inkietud ta circula riba e scarsedad den mercado laboral.
“Nos maneho ta dirigi riba e politica di gobiern di Aruba pa percura cu nos yiunan di tera haya trabao prome y unda cu no tin yiu di tera permiti acesso na ciudadano stranhero, pasa via filtro di DPL, Dimas, tin diferente categoria.”
Gobierno ta mirando cu desempleo ta bahando y den proximo simannan lo haya e cifra di 2023. E politica di pone yiu di tera na trabao ta dunando su resultado segun minister Croes pero e realidad ta cu Aruba ta den un progreso economico turistico asina rapido, cu mester mas trahado p’e proyectonan bao construccion.
“Pa tambe ora cu nan habri, y tin varios hotel ta bay habri. Riba dje e transformacion di e zona di refineria y proyectonan cu ta bin riba tereno di energia.” Gobierno por confirma tambe e noticia riba descubrimento di camponan di gas, tur esakinan segun minister Croes ta bay trece diversificacion y progreso economico.
Tur esaki lo rekeri su trahadonan riba e formato dirigi riba e sector energetico tambe. Mester bay papia cu nos hobennan bayendo Hulanda tambe banda di esunnan aki na EPI cu ta bayendo pa estudionan of carera den hospitalidad, nos hobennan na Merca y tur otro caminda studiando pa informa nan riba sector energetico y tecnico.
“Nos mester pa nos hobennan bin bek. Desempleo ta bahando y desempleo general e ultimo cifranan cu nos tin ta mustra con a haya te na 4.3%. E desempleo bao hoben ta rond 9% cual tabata hopi mas halto. Nos mester pa nos hendenan bin bek Aruba y mi ta consider’e parti di mi tarea pa crea condicionnan pa tur nos yiunan di tera.”
