Habri y uza un cuenta bancario basico ta un necesidad pa tur ciudadano por forma parti di e sistema financiero y uza servicio financiero. Sin un cuenta bancario ta exclui nos ciudadano- y companianan di por spaar, haci y ricibi pago via un sistema sigur. E exclusion financiero aki ta stroba e crecemento, progreso y bienestar di cada uno.
“Exclusion financiero ta un desaroyo cu sigur tin nos atencion”, segun Minister di Asuntonan Economico, Comunicacion y Desaroyo Sostenibel, mr. Geoffrey Wever. Un pilar di e maneho economico ta stimula inclusion financiero. Cada ciudadano mester por tin un cuenta bancario basico pa por realmente participa den e sistema financiero. Un cuenta bancario basico pa tur hende tambe ta forma parti di e Landenpakket. Accesso na un cuenta bancario basico ta un condicion necesario pa un economia duradero y fuerte.
Pa crea e condicion necesario pa un economia duradero y fuerte, Minister Geoffrey Wever a pidi y a ricibi di Centrale Bank van Aruba un concepto di ley pa stimula cu cada consumidor y compania por habri y uza un cuenta bancario basico na Aruba. Diferente publicacion di entre otro Organization for Economic Cooperacion and Development, Worldbank y Europese Bankautoriteit ta mustra riba e importancia di inclusion financiero.
Participacion den e sistema financiero ta esencial pa desaroyo y ta den liña cu e principio di Sustainable Development Goal, leave-no-one-behind, no laga ningun ciudadano atras.
“Awo cu mi a ricibi e concepto di ley, e siguiente paso ta pa papia cu tur stakeholder y despues presenta esaki na Parlamento di Aruba”, segun minister Geoffrey Wever.
