Diaranson merdia, minister di economia, mr. Geoffrey Wever a sinta den Enfoke pa, den cierto forma y manera e mes a indica, duna cara pa loke ta e aumento drastico di prijs di combustibel na Aruba. El a cuminsa na bisa cu e sa di e impacto cu e cambio den prijs ta bay tin riba tur otro cos y cu chens ta grandi cu lo subi ainda mas den e lunanan nos dilanti.
E ta basa su mes riba e pronosticonan di entidadnan internacional manera Goldman Sachs cu ta wak e prijs di bari bay for di e actual 120 dollar, te na 140 dollar pa cada un. “E pronostico no ta positivo. No ta algo cu nos tin den nos man; ta riba mercado internacional ta cumpra gasolin y diesel,” asina Wever a declara.
Tampoco ta nifica cu el a keda man crusa y wak e prijs keda subi. Hunto cu su ekipo a busca alternativa pa absorba e prijs, manera el a anuncia algun siman atras. Sinembargo, e propuesta presenta na e College Financieel Toezicht (CFT) no a haya un bendicion di parti di e organo di supervision. Aruba simplemente no tin espacio pa maniobra.
E titular di economia ta spera cu proximo biaha por haya miho cooperacion di CFT teniendo na cuenta e circunstancia di Aruba caminda tur cos ta importa. “Ta lamentabel cu no a haya oido mientras cu a haci tur ehercicio pa mustra cu esaki por ta un opcion,” Wever a bisa pasobra ya caba ta trahando pa bin cu otro alternativa. Bay contra di CFT no tabata un opcion pa Pais Aruba ya cu pa 2022 ainda tin mester di sosten di likides y no por risca keda sin haya esaki y no cumpli cu e obligacionnan paso ainda e entradanan no a yega na e nivel di 2019.
Pa e relato completo, lesa e proximo edicion di TREMPAN
