Awe, un evento special a tuma luga na Colegio Hilario Angela, caminda Minister Geoffrey Wever a tene un encuentro interactivo cu e muchanan di zesde klas. E obhetivo principal tabata pa discuti y conscientisa e hobennan tocante e importancia di desaroyo sostenibel y con nan mes por contribui na un futuro mas berde y sostenibel pa e proximo generacion.
Durante e bishita, Minister Wever a comparti su vision y pensamentonan tocante desaroyo sostenibel, enfocando riba areanan manera conservacion di medio ambiente, uzo responsabel di recursonan natural y promocion di tecnologianan limpi. E a pone enfasis riba e papel crucial cu e hobennan tin den e lucha contra cambionan climatico y otro desafionan ambiental.
E discusion tabata uno apasionante, caminda e studiantenan a keda profundamente envolvi, haci preguntanan y compartiendo nan ideanan y preocupacionnan tocante e futuro di nan isla y mundo. Minister Wever a elogia e entusiasmo y curiosidad di e hobennan, y a motiva nan pa sigui busca conocemento y compromete nan mes den accionnan concreto pa yuda proteha y mehora nos planeta.
Minister Wever tambe a mustra rib’e importancia di educacion den e proceso di fomenta un mentalidad mas consciente y responsabel riba tema di medio ambiente. El a subraya cu educacion ta e yabi principal pa capacita e proximo generacion pa enfrenta e desafionan cu lo bin y pa nan por tuma decisionnan informa y sostenibel.
Na final di e encuentro, tanto e studiantenan como e docente a expresa nan gratitud pa e oportunidad di por a interactua directamente cu Minister Wever y pa e conocemento valioso cu nan a ricibi. Esaki sin duda ta un paso significativo den e direccion corecto, y e combersacion aki ta solamente e comienso di un dialogo continuo y colaboracion entre e gobierno y comunidad educativo pa logra un futuro mas sostenibel pa tur.
