Scol basico Prinses Amalia tabata contento di por a ricibi un bishita di Minister Geoffrey Wever riba diaranson, 8 di november, kende a trece un mensahe inspirado pa e studiantenan di 6e klas. E bishita ta un parti di un esfuerso pa eleva consciencia entre e hobennan riba e tema vital di desaroyo sostenibel. E intercambio entre e minister y e muchanan a enfoca riba e rol activo cu cada un di nos tin den crea un futuro mas sostenibel, inclusivo y husto pa tur.
Minister Wever, cu un acercamento personal y interactivo, a enfoca su charla riba e necesidad pa conserva medio ambiente, promove uzo prudente di recursonan natural y fomenta e uzo di tecnologianan limpi y renobabel. Accentuando e importancia di cada hoben su contribucion, el a inspira e hobennan cu e idea cu nan accion individual por tin influencia positivo, e.o. contra e desafionan medio-ambiental cu nos mundo ta enfrentando awor.
E dialogo a bira un sesion dinamico caminda e muchanan por haci pregunta y comparti ideanan propio como tambe preocupacionnan tocante medio ambiente, barionan sostenibel, pobresa y hamber, educacion, derechonan igual y inclusivo. “E pasion y curiosidad demostra pa e studiantenan ta impresionante”, segun Minister Wever, kende a stimula nan pa sigui educa nan mes y pa tuma pasonan practico pa contribui na un miho mundo.
E enfasis riba e rol di educacion den e proceso di conscientisacion ambiental tabata un punto clave den su mensahe. Minister Wever a reafirma cu esaki ta fundamental pa prepara e muchanan pa e retonan di futuro y pa capacita nan pa cuminsa pensa criticamente con pa tuma decisionnan informa y responsabel.
Minister Wever tin aprecio pa e studiantenan kende a contribui na un discusion ameno, y kier gradici e gerente y docentenan pa e oportunidad di tin un intercambio interesante cara a cara cu e hobennan. Esaki ta marca no solamente un otro encuentro educativo, pero un promesa di colaboracion continuo entre e sector gubernamental y educativo pa traha riba e herencia duradero di sostenibilidad na Aruba.
