Dialuna 13 november, Minister Geoffrey Wever a duna un presentacion over e economia di Aruba, den forma di gastcollege na studiantenan di IPA pa e vak ‘Economia’ como parti di e sector ‘Hende y Comunidad’ riba invitacion di docente di e vak Paula Kibbelaar. Esaki tabata uno hopi interactivo unda por wak e interes grandi di e studiantenan den e tematica aki pa nan formacion como futuro docente.
Minister Wever a splica e necesidad pa un modelo economico inclusivo y sostenibel, presentando e desaroyo economico cu Aruba a hiba desde Status Aparte como uno grandi, cual tabata particularmente impulsa pa turismo. Minister Wever a splica cu e cifranan ta mustra cu e Producto Bruto Domestico Nominal ta creciendo di forma consistente, pero Producto Bruto Domestico Real per capita ta mustrando un desaroyo menos fuerte. Tambe a trece dilanti cu e populacion Arubano ta enfrentando aumento abrupto y imprevisto di prijsnan riba mercado internacional cu ta wordo importa casi directamente.
Minister Wever a splica e desaroyo di e Producto Bruto Domestico desde 1986, e pandemia y su recuperacion. Tambe a splica bahada di poder di compra di ciudadanonan, falta di espacio y destruccion di naturalesa. E expectativa ta cu e bienestar y calidad di bida lo sigui di ta bou di mas presion. Minister Wever a trece dilanti cu sigui cu e trayecto manera e ultimo 30 añanan no ta un alternativa sostenibel y cu Aruba su economia mester bay over na formulanan economico cu ta sostenibel y inclusivo. El a splica cu e conceptonan ‘desaroyo sostenibel’ y ‘economia inclusivo’ ta esencia di e vision di Ministerio di Asuntonan Economico, Comunicacion y Desaroyo Sostenibel.
Turismo ta keda sin mas e sector principal di nos economia y mester keda traha pa mantene e calidad servicial di nivel halto cu nos ta brinda na nos bishitantenan. No obstante, ta di remarca, cu diversificacion economico di nos pais ta mas un necesidad cu un deseo. Minister Wever a presenta e seis sectornan prometedor den cual nan diversificacion ta di tuma luga. A ilustra na nos futuro docentenan e scenario di sigui fiha solamente riba turismo cu construccion di mas hotel y kico esaki tin como consecuencia pa nan ofishi. Den un forma interactivo a sigui trata nan rol como docente den e cuadro di desaroyo sostenibel.
Pa pone e teoria den practica, Minister Wever a splica su maneho economico pa Aruba ilustrando entre otro: e necesidad di incentivonan fiscal y incentivo di inversion, e modernisacion di e maneho di otorgamento di permiso pa negoshi, e rol di Aruba Investment Agency, e actividadnan pa stimula entrepreneurship, e colaboracion cu Colombia y Venezuela, revitalisacion di centro di Oranjestad y San Nicolas, e maneho di ‘Orange Economy’, plan pa combati economia informal, e desaroyo di un Agri-fund, implementacion di Aruba Fair Trade Authority, e curso tan yega na comunidad ‘Finansas den mi Hogar’ y e implementacion di un Sistema Nacional di Estadistica.
Por ultimo ta na su luga pa menciona cu Minister Wever, conhuntamente cu Paula Kibbelaar a sa di stimula nos futuro docentenan pa pensa activamente riba e pasado, presente y e futuro economico di pais Aruba.
Minister Wever ta contento di por a intercambia over e topico di economia y desaroyo sostenibel cu futuro docentenan y ta desea e studiantenan hopi exito cu nan estudio!
