E proyecto hotelero Secrets ta un proyecto cu ta hopi den noticia ultimo temponan, ya cu hopi ta esunnan cu ta contra di e proyecto aki.
Prome Minister, mr. Evelyn Wever-Croes a reitera cu Gobierno di Aruba di un forma legal, a otorga tur e permisonan relevante na e desaroyadonan di Secrets. El a bisa tambe cu e proyecto aki a cuminsa bou di e mandato di ex-Minister Otmar Oduber. E permiso di construccion ta duna legalmente y ta cumpli cu tur exigencia di ley.
E mandatario a bisa cu tabata tin como binti caso den corte y den tur caso a check esaki pa yega na e mesun conclusion. E ley cu ta stipula esaki ta e mesun ROPV y den e ley aki, cu ta un ley a pesar di tur esunnan cu a trece nan obhecionnan dilanti, a tene cuenta di kico por y kico no por. N’e sitio ey por bin un hotel di tres piso y den cuadro di e ley aki, Gobierno ta actuando.
Dia 10 di mei tabata tin e ultimo veredicto den corte, den un caso entama pa e habitantenan cu tin problema cu e hotel. Pa prome biaha hues a tuma e decision di pospone e proyecto (Schorsende werking) n’e hecho cu e habitantenan tin un obhecion entrega.
Unabes cu entrega e obhecion tin cu para cu tur cos, cual no ta para den e leynan di Aruba. Gobierno di Aruba no ta di acuerdo cu e veredicto y nan a apela esaki. Ta spera cu dentro di poco por tin un decision riba e apelacion aki.
