Relaciona cu e blackout di mas recien cu a tuma luga na nos isla, esta dia 9 di juni ultimo, minister di energia, Glenbert Croes, a bisa cu sigur esaki tin su atencion y cu a pidi e compania estatal concerni, WEB Aruba N.V. pa no solamente informa di kico a bay malo, pero bisa tambe con ta bay impidi pa esaki ripiti. Segun el a aclaria, e blackout no tabatin nada di haber cu sabotahe.
Diahuebs ultimo, dia 9 di juni 2022 pa mas o menos 1:51 a registra un fayo den e suministro di coriente na diferente punto di Aruba. No mucho despues, e compania productor di coriente, esta WEB Aruba N.V. a informa cu tabata trata di un blackout na nivel nacional. Locual a destaca sigur ta cu a surgi problema hasta na aeropuerto pa via di e blackout aki y tur operacion tabata paralisa y a hasta evacua e pasaheronan. Tambe SETAR a enfrenta problema di coriente, velocidad di e red LTE tabata afecta.
No mucho despues di e prome informe di blackout a indica cu e fayo a surgi den e planta nobo RECIP IV. Mesora a cuminsa traha riba esaki pa lanta produccion bek y via e otro plantanan di RECIP, boiler y turbina di gas a logra recupera 100% di coriente pa 3:39 pm.
