Aruba Tivoli Club a organisa e prome Parada di Flambeu na aña 1967. Despues di dos aña sin organis’e, pa motibo di restriccionnan den pandemia, e aña aki atrobe SMAC a organisa e parada. Den participacion di publico, e ta esun di mas grandi di nos carnaval, cu un grupo grandi di hoben participando activamente den dje of cant’i caminda.
Minister mr. Xiomara Maduro, encarga cu maneho di finansa y cultura a cende e flambeu pa duna inicio na e parada, den presencia di Darren van Ommeren di SMAC y altocomisario drs. Ramon Arnhem di Cuerpo Policial Aruba.
E parada a start exactamente 7:59 pm y lo cubri e mesun ruta di semper, pues for di Avenida Milio Croes te CITGO Boulevard. Ta calcula cu tin mas o menos 6 mil participante den e parada e aña aki, parti entre seis grupo di cual Touch of Brazil (TOB) ta esun di mas grandi.
Cerbes Chill ta e patrocinado oficial di carnaval 69 y ta invita henter comunidad pa disfruta di tur evento responsablemente.