Directiva di SABA a bisa publicamente cu ta desea pa Minister Dangui Oduber tin e timon bek. Esey ta nifica cu posiblemente den e maneho Minister Oduber a haci un bon trabao. Riba esaki, e mandatario a indica durante di un conferencia di prensa dialuna, cu e ta basta ocupa cu su propio ministerio.
SABA ta un lastigpakket y no ta un situacion facil. No ta un situacion deseabel tampoco. Tin hopi reto cu lo mester cumpli cu ne. Esaki tabata tempo cu e mes tabata encarga cu SABA, caminda cu no tabatin e transparencia financiero cu un fundacion lo mester tin.
Gobierno tambe ta hopi limita den su autoridad den SABA, a pesar cu ta gobierno t’esun cu ta subsidia 23 miyon florin. Gobierno no tin ni un miembro den e Raad van Toezicht. Nunca kier a duna gobierno tampoco un stoel den e Raad van Toezicht, cual sigur no ta algo saludabel, sabiendo cu ta gobierno t’esun cu ta subsidia e fundacion.
E no ta bay p’e gobierno aki, sino pa cualkier gobierno den futuro. Na momento cu ta subsidia cualkier fundacion, mester por tin cierto autoridad si den e fundacion, cual den e caso di SABA ni Oduber, ni minister Arends, ni ex-minister Schwengle of cualkier otro ex-minister no tabatin’e.
Tin un problema financiero eynan, segun e mandatario. Minister Arends ta haciendo tur loke ta na su alcance pa busca un solucion pa SABA y tin e confiansa cu e lo por sali afo tambe den tur e retonan cu e tin n’e momentonan aki cu SABA.
