Dialuna anochi Minister di Turismo y Salud Publico Dangui Oduber atende un evento hopi importante pa Aruba su turismo como tambe su cultura y herencia. Despues di 3 aña e 4 museonan cu ta bou encargo di Fundacion Museo Arubano (FMA), a habri nan portanan bek pa nos turista y nos localnan.
A anuncia esaki den un evento cu a tuma lugar den Fort Zoutman door di Minister di Finansa y Cultura mr. Xiomara Maduro.
E tabata un anochi ameno caminda Minister Oduber a hiba algun palabra splicando e importancia cu e museonan tin pa Aruba su turismo. Segun e mandatario tin hopi demanda di turista cu kier experencia y sa mas di Aruba su cultura y su herencia.
E museonan di FMA a cera nan porta durante e pandemia. Despues di e pandemia no tabata facil p’e museonan habri nan portanan bek. Minister Maduro a acerca Minister Oduber pa wak ki posibilidad tin pa por habri e museonan bek.
Despues di hopi empeño di Minister Maduro y danki na Aruba su turismo cu ta creciendo, Minister Oduber por a percura por medio di e fondonan di Aruba Tourism Authority (ATA) y Aruba Ports Authority (APA) pa hunto habri e museonan bek.
E cuater museonan cu a habri nan portanan bek ta:
- Museo Historico na Fort Zoutman
- Museo industrial na Water Toren San Nicolas
- Museo di comunidad na San Nicolas
- Museo di Carnival Euphoria na San Nicolas.
Cu e habrimento di e tres museonan na San Nicolas, esaki sigur lo percura pa tin mas trafico di turistanan p’e comercio di pariba di brug.
Minister Oduber ta contento cu e museonan por ta activo bek. E mandatario ta consciente di e importancia cu nos historia, nos cultura tin pa nos como Arubiano. Di otro banda mas y mas nos bishitantenan kier conoce nos historia y con Aruba a desaroya su mes den e ultimo decadanan. P’e motibo aki tabata importante pa logra haya e fondonan pa haci e reapertura di e museonan posibel.
Minister Oduber a sigura cu su Ministerio semper a compromete su mes cu Aruba su historia y cultura. A sa di yuda cu fondonan por medio di APA, ATA y tambe TPEF cu ta yudando den e restauracion di nos Museo Arqueologico cu tin varios proyecto cu ta andando. E ta importante pa nos museonan ta habri pa turista por bishita nan y haya sa mas di nos herencia y nos cultura.
Finalmente Minister Dangui Oduber a gradici colega Minister Maduro, FMA, ATA y APA pa logra haci esaki posibel.
