Leadership Team di Aeropuerto Reina Beatrix a invita gobierno di Aruba pa haci inspeccion di proyecto Gateway 2030, cual awor ta riba su prome fase. Gobierno ta hopi impresiona di e avanse y progreso, manera tambe riba e tecnologia cu lo bay uza. E area lo conta cu un sistema di maneho di maleta di mas moderno na henter Caribe y Latino America. Na Merca mes ta un of dos aeropuerto ta haciendo uzo di e sistema aki cu lo percura pa mehora eficiencia y rapidez.
Fase 1A ta den ehecucion na momentonan aki. Den su totalidad ta papia aki di un inversion di 143 miyon dollar. E proyecto ta maneha, guia y ehecuta pa contratistanan local, trahadonan local cu productonan local tambe. “E spin-off economico di un proyecto asina pa nos economia tambe pa gobierno di Aruba ta enorme,” segun minister Oduber.
E mandatario ta enfatisa di ta hopi orguyoso como Rubiano pa mira con Aruba ta bay tin e miho aeropuerto den henter Caribe y region di Latino America unabes tur e fasenan ta completo.
Fase 2 ta den planificacion pa sigui cu Fase 3, unabes Fase 1a keda cla ta un biaha so e turista ta pasa busca su maletanan dus e flow ta bay ta hopi mas eficiente, hopi mas lihe. “Lo mehora experiencia p’e local y turista enormemente unabes Fase 1a keda cla n’e manera cu lo procesa maleta pero tambe pa check-in.”
