Diaranson mainta Minister di Turismo Dangui Oduber ricibi un recorido na Aeropuerto Reina Beatrix pa wak e proyecto di Gateway 2030, Fase 1A. Durante e conferencia di prensa un di e lidernan di e proyecto a presenta e planificacion di cada fase cu su diseño, Minister Dangui Oduber a keda hopi impresiona con e proyecto aki ta canando den e tempo stipula.
Gateway 2030 ta un proyecto grandi di 143 miyon dollar Mericano cu lo genera entre 200 y 300 cupo di trabou sea directo of indirecto cu AAA. Unabes cu e fase aki keda cla, biaheronan pa Merca lo bay check-in un biaha so y no lo mester piki maleta bek prome cu subi avion. Ta un proyecto importante pa e ampliacion y renobacion di nos aeropuerto.
Minister Oduber a enfatisa cu e proyecto aki ta ehecuta pa contratistanan local y mayoria di e materialnan di construccion ta cumpra na Aruba mes. Nos mester ta orguyoso tambe di por bisa cu Aruba ta bay ta e prome aeropuerto asina moderno den e region di Caribe y Latino America. E flow di ora e biahero check-in na balie te ora cu e subi avion lo ta mas eficiente, mas lihe pa e turista y e local cu ta biahando pa Merca, mehorando asina e experiencia di e biahero.
Aki e mandatario por recorda cu lo drenta den Fase1B y despues pa drenta Fase 2 & 3 di e proyecto di Gateway 2030. CEO di AAA Joost Meijs a compaña Minister Oduber durante e bishita aki conhuntamente cu demas lidernan di e proyecto.
Minister Oduber sa cu esaki no ta un proyecto facil, e tin hopi complehidad cu ne mirando cu e ta na un aeropuerto cu mester keda operacional na tur momento pero tin tur e confiansa den ful e POM team, AAA y ademas lidernan di e proyecto cu ta trahando duro pa por entrega Aruba un bunita aeropuerto moderno y innovativo cu nos turistanan y localnan por disfruta di dje.
