Tur hende ta reconoce e situacion financiero di e compania. Placa no tin pa inverti of pa malgasta, ta loke minister Ursell Arends a indica den un entre bista. El a trece esaki tambe na conocemento di tanto sindicato como di Raad van Commissarissen di Arubus, cu ta percura pa maneho di e compania estatal aki, hunto cu Arutram, ta na su luga.
Mester percura p’e companianan aki, cual ta su responsabilidad como minister, garantisa e usuarionan di transporte publico cu nan por haya e servicio cu gobierno ta duna subsidio pa garantisa e servicionan aki door di Arubus, Aruparking y Arutram.
E ta duna tur hende e beneficio di duda pa nan por ehecuta nan tarea y tin tur confiansa cu Raad van Commissarissen cu tin ta hende profesional, cu tin experiencia tanto den e parti legislativo y tambe di finansa. Por conta riba nan cu nan ta tuma e decisionnan adecuado pa loke t’e maneho di e compania estatal aki.
Minister Arends a splica cu e ta duna oido n’e situacion, pa por tin paz laboral den Arubus. Esey ta su meta principal. Tambe p’e usuarionan cu ta depende di loke ta trata transporte publico, por ta garantisa cu nan ta haya e servicio cu nan ta depende riba dje.
