Den luna di december Amsterdam Manor a gana un caso mas contra gobierno cu ta relaciona cu e holo stinki cu ta ricibi for di e planta di purificacion di awa RWZI. Nan a presenta un solucion na gobierno cu cual corte a bay di acuerdo cu ne. A logra mitiga e holo malo cu ta bini for di e planta mientrastanto, pero cu mester di un RWZI nobo ta un echo.
E solucion cu a presenta ta cu tur luna mester cumpli e materialnan necesario pa uza den e planta pa evita e holo malo y mester haci esaki te ora cu soluciona por completo e problema actual cu tin cu e RWZI.
Den combersacion cu Minister di Naturalesa Ursell Arends, el a bisa “si nos ta cumpli cu decision di corte pa evita cu mester paga e dwangsom”.
Gobierno mester inverti pa percura cu e brushrooternan, clarifiernan y otro parti di e instalacion ta funciona debidamente. A haci inversion pa pone nan bek den funcion. A inverti tambe den bio augmentation (uzando productonan pa evita e holo malo) y den esaki ta haya apoyo tambe di Ministerio di Infrastructura y ATA (Aruba Tourism Authority) cu a compromete nan mes pa inverti tambe den e bio augmentation cu ta cu ta mitiga e holo y cu e operacion ta cana bon. Di e forma aki ta cumpli cu loke a bisa den corte.
Tanten cu ta uza e bio augmentation lo mitiga e holo. Pero realidad ta cu mester tin un RWZI completamente nobo y ora cu esaki wordo privatisa ta cuminsa inverti den dje. Lo dura entre 24 y 30 luna prome cu tin un RWZI nobo. “E problemanan cu tabatin den pasado e ora lo keda pa pasado. Esey ta e direccion y compromiso cu tin di parti di gobierno di Aruba.”
