Diabierna 4 di juni ultimo, un otro caso di asesinato ta sacudi nos isla. Ta trata di un dama cu a haya un tiro den cabes den un cas na Flamboyanstraat. Tata di e victima , Mike Petronia, lo bin c’un bumperstickeractie.
Petronia a informa cu e ‘bumperstickeractie’ lo tuma luga den Flamboyanstraat, e mesun caya caminda cu asesinato a tuma luga, diasabra pa 5:00 pm. Motibo di e accion aki ta pa conscientisa pueblo cu nos no por sigui asina aki, cu tanto arma di candela cu tin y cu mester haci algo. E no ta bay stop te ora cu e haya husticia pa su yiu muhe, Sayuri Petronia, victima di asesinato.
Esun cu conoce Mike Petronia sa cu semper e ta bezig cu algo pa comunidad. Pero e biaha aki tragedia a bati na su porta y e ta hacie dolor. Tin hopi arma di candela riba caminda y niun hende ta haci nada. El a sigui bisa cu nada. Tambe e ta buscando husticia pa su yiu y ta exigi bida largo den prizon. E no ta hala atras tanten cu e no ta haya esaki.
Varios parlamentario a pidi un reunion pa trata loke ta pasando, ya cu tin 6 morto den 6 luna. Pero te ainda presidente di parlamento no a yama e reunion aki. Gobernacion ta un continuacion, no ta pasobra cu ta den eleccion, no por yama e reunion. Petronia a bisa cu meser yama e reunion awo, prome cu eleccion.
Por ultimo, Mike Petronia a duna un conseho na tur hoben, pa nan keda corecto, studia, traha,pa nan keda riba e bon caminda. Un y tur ta invita pa e ‘bumperstickeractie’ den Flamboyanstraat, caya unda e tragedia a tuma luga, unda cu Mike Petronia mes ta biba.
E stickernan ta gratis, door cu el a haya algun sponsor pa yud’e den print e stickernan. “Sayuri su morto mi no ta laga bay perdi,” Mike Petronia a finalisa bisando.