Ex prome minister di Aruba y lider di partido AVP den un discurso di ultimo dia di 2020 a repasa e situacion di Aruba.
A papia di e dolornan cu e pueblo a pasa aden, con e mes ta bira e situacion y kico ta su speransa pa 2021. El a papia di tin confiansa cu e pueblo lo sali di e situacion pasobra historia a demostra cu e pueblo tin un espirito di lucha, a y lo sobrepasa tur obstaculo cu haya den nan caminda.
Apreciabel conciudadanonan, Amigonan,
E momentonan aki di transicion di aña, cu nos ta comparti den e calor di presencia di nos amigo y famianan ta momentonan di anhelo pa un miho mañan combina cu recuerdonan profundo.
Mas cu tur otro momento den bida, esaki ta e dia y oranan cu nos ta observa con nos bida y bida di nos pais a transcuri. Esaki tabata un di e añanan mas dificil cu nos comunidad y nos Pueblo a pasa aden.
Pero mes grave y penoso cu e situacion ta, mes profundo, serio y huicioso nos respuesta mester ta pa nos por supera e menasa pa nos salud y e daño grandi cu e virus ta laga den su rastro. Nos pasonan mester por apela riba contribucion di un y tur pa nos por cuida salud di nos ciudadania y pa nos por crea un plataforma nacional pa rescata nos desaroyo socio economico pa futuro
Esaki ta e momento husto pa stipula nos compromisonan pa futuro. Mira bek riba e realidadnan cu nos a biba pa recohe e curashi y profundisa e determinacion pa trece e cambionan necesario pa crea un miho mundo pa humanidad, un miho Aruba pa nos conciudadanonan. Den nos pais tin e forsa, e energia y optimismo pa trece cambionan aki.
Cu recuerdo profundo y gratitud den nos curason nos ta ora pa Bendicion pa Aruba henter. Awenochi mi kier a comparti hunto cu coleganan sentimientonan aki di reflexion, di convivencia y di e calor cu ta compaña nos entre nos famia, amigo y bisiñanan na e momentonan aki.
Apreciable Conciudadanonan,
Cu coleganan awenochi nos a comparti nos compromiso pa guia nos Pais for di e incertidumbre cu nos ta experenciando. Nos ta convinci cu nos mester ta bon prepara pa supera y tambe pa enfrenta ainda mas situacionnan cu por sorprende nos dor di e rapides y e naturalesa imprendicibel di e desaroyo sin precedencia aki.
Cu efectonan segundo, tercer, cuarto y mucho mas cu ta bin riba nos di e pandemia nos mester ta prepara. E profundiad di e crisis aki y su imenso complicacionnan ta pidi pa un reflexion mas profundo cu nunca antes riba e caminda di salida pa Aruba y nos Pueblo por recupera felicidad y stabilidad atrobe.
Si nos tabata tin mester dilanti otro crisisnan den nos historia sabiduria, vision, accion rapido y pro-activo cu dialogo habri y cu trato digno di tur partner social den comunidad, tur esaki ta mas necesario awe cu nunca antes.
Nos ta preocupa pasobra nos no ta mire na e momentonan aki.
Nos ta hopi preocupa pasobra e sensates pa realisa e dolor den comunidad, e humildes pa scucha otro, e sano huicio cu esaki no ta momento pa division, pero e momento pa inspira union no ta presente den e guia di nos Pais.
Aruba mas cu nunca mester di un mensahe, un vision, un luz na horizonte, un causa comun nobo cu cual nos por inspira e miho forsa y talentonan den nos Pais pa hunto cu Pueblo trece nos riba rumbo di felicidad.
Conciudadanonan,
Manera hopi di Bosonan nos a pasa hopi oranan den nos hogar pa proteccion di un pa otro.
Den nos caso personal, nos a biba tambe momentonan di hopi angustia cu salud di mi Señora Doina. Cu Boso sosten y oracion, cu Man di nos Creador Doina awe ta riba e caminda di sanacion. Un danki di curason pa Boso sosten y apoyo.
Den e dia y simanan largo ey mi a pasa tambe den un reflexion profundo riba e solucionnan pa e situacion grave di nos Pais. Esaki a trecemi na e historia inspirativo di nos Pais. Con nos hendenan a biba den e prome oranan di un sociedad riba e baranca aki cu yama Aruba. Di nos indjanan te cu awe. Pensamentonan cu lo mi comparti cu nos comuidad den un buki, como un inspiracion pa un speransa nobo, pa reenforsa nos confiansa propio, pa nos uni den formulacion di un causa comun nobo. E locual den transcurso di nos historia semper tabata nos forsa. Soña di un miho mañan, kere den algo grandi pa nos Pueblo y Pais y traha cu alma y curpa pa logre. Dream it, believe it, achieve it. Ta forma esencia di e Pueblo di Aruba su espirito di lucha.
Den e recorido di nos historia cu mi a profundisa mi mes den dje a bira hopi cla cu pa nos Pueblo pasando momentonan hopi dificil, sintiendo cu nos retonan ta insuperabel, tin hopi forsa y inspiracion cu nos por recohe for di historia di nos antepasadonan. Nan a biba frente retonan di añanan di secura, pobresa penoso, perdida di bida di hamber y malesa y toch a perdura y a supera. Convivencia, apoyo y sosten comunitario, creencia y Fe a duna nan e forsa aki.
Di nos sentimento pa un soño cu ta apela na lo miho den nos, den nos preocupacion pa e bienestar y necesidadnan di otro, nos ta uni y actua. Atrabes di nos exitonan comparti, nos ta sinti nos mes orguyoso di ken nos ta, orguyoso di nos soño y decisionnan, orguyoso di nos isla.
Mescos cu nos antepasadonan nos tin e responsabilidad pa converti nos mes den heroenan di nos historia. E momentonan di logronan ey den nos historia ta duna nos forsa, Conecta entre nan mes, e momentonan ey ta forma nos marca di referencia. E momentonan ey, ripiti y enforsa atrabes di tempo, ta converti nan mes den un parti intrinsico di ken nos ta, como individuo, un pa cu otro den comunidad y hunto como Aruba.
Historia ta mustra cu nos a traha duro pa a yega unda nos ta awe. Nos a lucha sin tregua. Como sernan humano nos mester tin un meta nos dilanti, un proposito, un causa y meta cu nos tur ta defende. Un obhetivo y ambicion cu tey na horizonte cu tin un efecto inspirativo y unificado.
Nos ta consciente cu nos yudansa uno pa cu otro nos ta construi un red di apoyo na cual tur hende por recuri na dje e dia di mañan. Cu esaki nos ta pone den practica un bunita relacion cu un bon causa. E liñanan invisibel aki di amistad, stimacion, di solidaridad y convivencia tur carga dor di e virtud mas grandi cu tin: nos amor pa nos prohimo.
Conciudadanonan, nos tin cu haya e metanan comun aki atrobe, nos tin cu para hunto pa un causa comun. E causa ey awe ta mas bisto y urgente cu nunca; e recuperacion di felicidad den nos pueblo, alegria den nos hogarnan, salud y bienestar di nos pueblo, prosperidad comparti, solidaridad cu nos hendenan.
Hopi aspiracion. Un reto grandi. Pa logra esaki nos mester cuminsa pone un banda rencor, envidia y odio. Nunca e mensahe di nos Creador lo yega pa guia nos riba e caminda di salbacion si den guia y dirigenca di nos Pais nos no purifica nos curason y alma di e sentimentonan ey. Y cuminsa biba, pensa y traha pa nos Pueblo y Pais.
Conciudadanonan,
Lo mi tabata tin gana di bishita boso den e momento aki, wak boso den boso wowo. Duna cada un di boso un caluroso abraso di aprecio, stimacion y apoyo. Pero esey no por awo, no mag awo. Hustamente na momento cu mas cerca nos mester ta di otro, circumstancia ta pidi distancia. Cuanto ta esnan cu a sufri perdida cu nos kier brasa cu amor pa consola. Un forsa awenochi pa tur e famianan cu a perde nan sernan keri y na tur esnan cu kebrante di salud. Awenochi y e dianan aki ainda nos calor pa otro nos tin cu expres’e den un otro forma huicioso y cautoloso pa nos cuida otro. E no ta facil, pero hopi necesario awor. Ban sigui e reglanan cu autoridad y expertonan di salud ta comparti cu nos. Wak rond di bo ken mester di ayudo. Ban cuida otro, yuda otro y specialmente esnan mas vulnerabel. Comparti e tareanan diario necesario uno cu otro.
Awe mas cu nunca Aruba mester di nos miho virtudnan. Hunto, den union mester bay carga e rescate di nos futuro. Partido di Pueblo Arubano consciente di su yamada y responsabildad a incia un proceso di scucha, pensa pa Aruba por recupera miho.
Cu humildes nos ta cana e caminda aki. Cu un compromiso profundo nos lo ta cla pa ehecuta e vision di recuperacion aki cu talentonan nobo, sosteni pa añanan di experiencia y conocemento, cu sosten y decision di nos comunidad. Un team y un plan pa Aruba por recupera su felicidad y cu cambionan pa haci nos ainda mas duradero y cu un futuro cu prosperidad comparti pa un y tur.
Laga wordo bisa di nos cu a enfrenta e momento crucial aki cu nos a responde y a supera e retonan di nos tempo. Nos mester ta e pioneronan pa un etapa nobo di rescate, recuperacion, progreso, di cambio, reformacion y renobacion.
Conciudadanonan, hunto cu mi coleganan y mi señora Doina, cu un curason yen di gratitud pa Boso apoyo y sosten den un tempo dificil pa nos y henter Aruba nos ta ora y mira na cielo cu e deseo cu nos Creador por Bendiciona henter Aruba; ilumina nos curason cu un speransa nobo pa hunto nos drenta un aña nobo cu Fe y amor pa trece felicidad bek riba nos isla y den nos hogarnan.
Un caluroso abrazo y hopi Bendicion.
Bon Aña Aruba
