E tema di ley di cacho ta atrobe den boca di pueblo, mirando e incidente lamentabel cu a bini dilanti ultimo dianan aki relaciona cu maltrato di bestia den caso di e cacho Khalisee. Ora cu bo repasa e ley di cacho, entre otro no ta duna mucho espacio na Ministerio Publico como tampoco polis ora ta trata implementacion.
Pregunta awor ta si ta esunnan a prepara e ley aki no a haci suficiente, of si ta na e asignatura actual cu no ta haciendo nan debido trabao den gobierno pa percura cu esaki cana debidamente. AVP a pasa e ley 12 aña pasa y ta enfatisa cu si algo no ta bon den e ley, tabata tin suficiente tempo pa haci cambio den dje.
Tur ley, ora cu bay den implementacion di dje, si bo mira cu mester adapta cosnan mester haci proposicion p’esaki segun lider di fraccion AVP, Mike Eman. Si polis ta mira cu un ley di algemenepolitieverordening mester un adaptacion, nan ta notifica wetgeving pa haci cambio p’esaki bini parlamento. “No tin niun ley cu ta perfecto. Continuamente parlamento ta cambiando leynan, pero e ta un excuus hopi barata pa ora un problema escala bay bisa e ora cu e ley no ta traha, sin cu a manda ningun proposicion pa haci cambio den e ley.” Eman ta enfatisa cu no ta goberna lagando reglamento perpetua cu pa semper ta keda sirbi e momento, e momento y condicionnan ta cambia dus gobernacion nobo cu sinta despues di otro gobernacion mester haci adaptacion unda cu mester.
“E cos grandi cu gobierno di AVP a haci ta traha un ley di cacho. E ta duna bo un base legal pa por hiba un maneho. Si bo tin cu adapt’e un caminda, bo ta mustra di ta incapaz pa ni yega na duna un cambio di ley pa ora e problema cristalisa bisa cu esaki ta pa via di ley bieu. Eman: “Asina e hendenan aki ta goberna tur dia, sin mustra responsabilidad y capacidad pa haci e trabao cu nan tin cu haci.”
