Lider di AVP, mr. Mike Eman, a duna di conoce cu si AVP no gana eleccion, e biaha aki SI e lo bira parlamentario. E politico a indica esey durante un programa special cu a keda transmiti awenochi.
Na 2017 manera ta conoci, AVP a sali e partido cu mas hopi voto, pero toch no a forma parti di gobierno. E partido a logra un total di 33114 voto na 2013 y na 2017 a cay te na 23385, cual ta representa un caida di casi 30%. Despues cu resultadonan di eleccion a bira conoci na 2017, Eman a anuncia cu e no lo keda na timon di e partido.
Un dia despues, resultadonan individual a bira conoci, di cual Eman a logra un total 7822 voto riba su nomber so, toch el a opta pa no bay parlamento. Eman no ta unico cu a nenga pa bay parlamento na 2017, Alex Schwengle y Richard Visser tambe a haci mesun cos.
Periodista Toko Winklaar a puntra Eman si e biaha aki si e lo bay parlamento si AVP no gana, mirando cu na 2017 el a nenga di bay representa casi 8 mil persona cu a deposita nan voto den su persona. Mr. Mike Eman a menciona cu: “Aunke mi no ta kere cu AVP lo perde eleccion, pero si ta e caso, mi lo acepta pa bira parlamentario.”
Mike Eman tabata parlamentario caba den pasado durante 2001 pa 2009. Na 2009 el a bira prome minister di Aruba despues cu partido AVP a gana eleccion cu 12 asiento, djey na 2013 e partido a crece ainda bou su liderazgo te na 13 asiento.
