Recientemente por a tuma nota di conmocion y desacuerdo den parlamento pa loke ta trata algun mocion presenta pa partido Raiz. Ta trata aki di e mocionnan entrega relaciona cu e deal di Eagle LNG y WEB Aruba N.V. Dialuna ultimo oposicion a entrega un mocion di desconfiansa riba minister presidente Evelyn Wever-Croes y tambe un mocion pa para e firmamento di e contract entre Eagle LNG y WEB Aruba N.V. Esaki a base di cu no a mira e documentonan relaciona cu esaki.
Pues, ta asina cu Raiz na prome instante a critica nan partner den coalicion pero despues a ‘dobla’ pa presion y a rechasa ambos mocion y na su luga, a entrega un mocion pa pospone e firmamento. Esaki a causa hopi controversia den e pueblo Arubano y pa clarifica, partido Raiz a bin pa dilanti pa splica pakico nan a dicidi pa keda den e coalicion.
Segun e fraccion a splica, ta oposicion kier a baha gobierno den un acto di politikeria. A sigui splica cu Raiz tin un compromiso cu nan sostenedonan y ta para pa nan principionan.
Den tur esaki, lider di fraccion di AVP a splica cu na ningun momento e no a spera cu Raiz lo benta gobierno abou, “mi no ta kere cu nan tin e curashi ey”. Den e ultimo dianan, el a splica tambe cu no ta posibel cu Arends y Wever no tabata na altura di e contract aki. Pues, no ta compronde con ambos ta forma parti di conseho di minister y coalicion y cu pa e ultimo tres lunanan tur hende na Aruba ta papiando di LNG y te ora cu Kamperveen a bay radio y bisa cu e no ta acepta e contract y ta e ora ey ta core saca un press release bisando cu nan ta para band’i dje.
Segun Eman a sigui splica, Arends a purba cambia expectativa di pueblo y cu ningun hende a purba baha gobierno. Di banda di oposicion, a entrega un mocion pa desaproba e forma cu prome minister a orkesta poniendo primo, sua, abogado den posicion pa firma un contract cu ta mara Aruba na mas di 20 biyon florin anto minister di integridad, esta Arends ta bira cara manera cu e no sa di nada. Asina Eman a bisa cu “Curashi…principio ta algo cu bo no por siña”. Pues, segun Eman locual a desapunta henter Aruba ta e comunicado di Raiz den cual a bisa cu a pospone e firmamento, mientras oposicion a entrega mocion pa para esaki.
