Na fin di dia, Hedging ta un decision di WEB segun Parlamentario di AVP Mike de Meza. Pero prome cu WEB tuma e decision eynan, a base di interes general, a base di stabilidad economico, WEB mester presenta esaki na su Raad van Commissarissen, automaticamente esaki tin cu bay pa Utilities Aruba.
Tin cu bin gobierno y gobierno mester presenta esaki na Parlamento. Awe sin mas, Evelyn Wever-Croes a duna instruccion pa hedge numa, sin cu sa cuanto e ta hedge, of pakico. Bo tin cu compronde tambe kico e ta nifica. Den esaki tin diferente premies cu ta paga. Ora bo hedge cortico, bo por bah’e, pero bo tin cu paga un premie mas halto. Tin cierto premienan cu tin cu paga den esaki. Ora bo hedge mas halto, bo tin beneficio y tambe risiconan tambe. Nada di esaki, ningun hende no sa. E prome minister mes no sa. E ministerraad no sa. Parlamento di Aruba no sa. Kico ta costa e hedging cu nan a haci awor aki. Kico ta e premiesnan cu nan mester a paga. Ora bo hedge tambe, bo por hedge un plaffond y no un vloer. Bo por hedge tambe un fixed price, pero na momento cu e baha, cu esaki bo ta cobra locual el a baha. Pa bo haci esey, tin un premie cu bo tin cu paga tambe, cu ta bastante dollar pa bari. Kico ta e hedging cu nan a haci.
Ta pesey netamente e decision cu a tuma den conseho di minister, bao di gabinete Mike Eman II, pa na momento cu tin e deseo, e necesidad, pa bay hedge atrobe, cu mester duna un presentacion na ministerraad. Na fin di dia mester bay parlamento cu esaki y discuti esaki. Awe atrobe ta mira cu nada di esaki a tuma luga. Ta simplemente un muestra cu e hendenan aki no sa con pa goberna, no sa kico nan ta haci. Awor aki de Meza ta spera pa bay wak si nan ta bay bin cu e hydrocable cu nan tabata papia riba dje pa hopi tempo, pasobra esey tabata e solucion. Si bo no hedge, bo tin cu bin bek cu brandstofclausule. E ora nos tur sa cu den pasado, bao di Gobierno di MEP, cu tarifa di coriente y awa tabata cambia 4 of 8 biaha pa aña, cu tur instabilidad cu ta trece pa e economia.
