“Mi kier alerta pueblo algo. Tin politiconan cu kier gana eleccion y sigui cu e mesun maneho di semper. Nos mester di un cambio di sistema,” Miguel Mansur, lider di Accion21 a bisa den e programa Enfoke.E tabata invitado di e presentadonan y durante cual programa a papia riba diferente tema, entre otro e echo cu ya tres aña ta pasando y partidonan ta cuminsa prepara pa eleccion di otro aña.
E mes personalmente ta preparando caba. E por bisa caba cu tin hopi cambio interesante biniendo, den panorama politico. Aworali, el a bisa, tin un miho bista di kico ta necesario pa un miho cambio.Por ehempel tin pendiente diferente ley pa pasa, manera esun di SVb pa duna e mama y tatanan mas tempo ora yiu nace, tin e leynan electoral, etc. Y nan mes ta den combersacion cu candidatonan nobo.
Den cuadro di tur esey e ta bisa cu e proximo eleccion lo bay ta uno hopi interesante pasobra babyboomers y esnan mas bieu lo no ta mayoria di e votadonan. Nan lo ta solamente 26% di e electorado, igual cu e milleniums cu tambe ta 26%. E generacion GenX (a vota un biaha caba) lo ta 30%, sigui pa GenZ (Zoomers cu ta mas o menos 13 mil votado). E dos ultimonan aki ta bira casi 40% di e electorado. Esaki ta duna Mansur e speransa cu lo bay mira mas cambio.Den cuadro di e datonan aki probablemente hopi partido a cuminsa shop around caba, manera e informacion cu a bin ta circulando cu Geoffrey Wever (di RAIZ) cu lo a haya diferente oferta. Mansur a bisa cu e tambe a scucha e famoso voice note. E lo ta sorprendi si e no ta combersando rond, Mansur a bisa. “Mi ta kere cu e voicenote cu a leak ta pa test e situacion. Di e forma ey e lo haya reaccion di su votadonan kico nan ta pensa si enberdad e bay cu MEP.
Si e haci esey, e lo ta su fin politico. Bo no por lanta cu un partido manera RAIZ pa bo bay contra e politica tradicional pa despues caba riba un lista tradicional.Den pasado Mansur a yega di papia cu ne y incluso a bini dilanti e tempo ey cu tabata dificil pa Wever bay cu un partido manera AVP pa motibo cu Hendrik Croes, tata di Evelyn Wever Croes tabata su mentor, pa cual su aliansa cu AVP lo tabata un traicion grandi.Como politico e por bisa tambe, e lider di Accion21 a comenta, e ta sali bon cu Wever, kende tin un bon personalidad. Pero, di otro banda, e tin hopi cos pa splica. Por ehempel con a forma gobierno, sin papia cu e otro partidonan, pa e bira minister. Tambe e ta haya un berguensa cu el a dedica un acera na dos comerciante a dedica hopi di nan bida na comercio, mientras cu na mesun momento comerciantenan ta bandona centro di ciudad a causa di e problema cu chollernan.Aruba y Accion21 kier mira mas cambio. Awo ta scucha hopi mensahe cu en realidad ta desconecta di e realidad.Pa loke ta Minister Arends, el a bisa cu e no tin nada contra dje. “E ta un nice hende. Por el a drenta politica cu bon intencion ora cu nan tabata masha contento cu ne na La Quinta, mientras cu niun hende ta contento cu ne den politica. Mi ta spera e saca su conclusion y bay bek sector priva. Politica no ta p’e.
Nan a guli’e, come bibo, a scupi’e, y e ta keda hari sin sa. Obviamente partido RAIZ ta den problema grandi. Nan no por hustifica cu no a logra hopi di nan metanan. Y MEP a haci y deshaci cu nan manera cu nan tabata kier.”Di otro banda, e bala ta miho pa e partidonan nobo, pero den e situacion actual, e no ta mira riba ki base nan lo logra pa bolbe. E ta bisa esey pasobra maneho di desperdicio no tabata nunca pio na Aruba, manera e ta awo; RWZI ta mes of mas mal para cu for di tempo nan a sinta.Un partido of un politico nobo ta cambia e situacion actual. “Mester mas cu un partido y un politico. Mester di un cambio di sistema y p’esey mester di politiconan cu ta realmente dispuesto pa ataca e sistema y kisas sacrifica nan carera politico pa haci e cambionan.” Aki e ta referi na e echo cu hopi politico ta trahando pensando si e cambionan lo costa nan voto den e proximo eleccion. E trabou mester ta enfoca pa crea un miho mañan pa pais Aruba. “P’esey mi ta bisa cu nos mester di algun politico kamikazi cu ta dispuesto pa sacrifica nan carera politico, pasobra algun di e decisionnan cu nos mester tuma ta dificil (y no popular) pero cu a lo largo lo beneficia henter e pais.
”El a bisa cu un politico cu nunca a tuma un posicion controversial riba un tema nunca lo logra cambio. Si mira den parlamento, bo ta mira e fraccion di MEP den Staten e ta uno sin conocemento y sin capacidad, y cu algun di e ministernan ta e mesun storia. “P’esey mi ta kere cu ta sigur nan lo papia cu Minister Wever y parlamentario Santos do Nascimento pa trece poco capacidad y conocemento den e partido. …. Awo nan ta leu di ta digno di e fundado di e partido.”Pa loke ta AVP ta den casi e mesun situacion. AVP no por pensa pa bini cu e mesun dinosaurionan si mira e cantidad di voto cu nan a perde den e ultimo dos eleccionnan, mas mirando cu nan tabata den oposicion. Ta blo papia di hisa pensioen, pero “Aruba no tin un mata di placa”. Pa hisa e pensioen te na salario minimo, mester di 200 miyon florin extra pa aña. Loke por logra ta subie cu 500 florin cu lo costa 100 miyon pero pa logra esey no por keda opone na e Rijkswet.Pa finalisa el a bisa cu e “populismo ciego cu a hiba nos na ruina no ta bay scapa nos pais. E abuso di poder, corupcion, nepotismo … no ta hiba nos pais na progreso …”
