Parlamento di Aruba a reuni cu Minister Presidente mr. Evelyn Wever-Croes riba e acuerdo di paga debe di pandemia cu Hulanda (leenovereenkomst herfinanciering Covid-lening). Den e reunion aki no por a pasa mocion ni nada otro cu haci pregunta.
Miguel Mansur, parlamentario (Accion21), a splica di a trece nan preocupacion dilanti. Ultimo biaha cu minister presidente a presenta parlamento, el a papia riba e herfinanciering. Aki e mandatario a splica cu a base di su proposicion pa un sistema hibrido Aruba lo cualifica p’e interes intermedio di 5.1%. Loke e mandatario a indica na parlamento e tempo ey, esey no ta berdad.
Pa Mansur liderazgo kiermen ora ta tuma credito cu cos a bay bon, pero tambe ta acepta responsabilidad cu ora cos no bay bon. Tin un minister presidente cu a bin indica cos na parlamento y a resulta cu no ta berdad. Segun e lider di Accion21, el a pidi Wever-Croes algun ehempel den su seis aña como minister presidente di a responsabilisa su mes ora algo a bay malo. E mandatario a bisa di a responsabilisa su mes, pero e no por a duna ningun ehempel. Resultado di esey ta cu Aruba ta paga 6.9% na luga di 5.1%.
Durante e reunion, Mansur a trece dilanti riba e echo cu tin e discusion riba e procesonan. E procesonan no a bay bon, no tin ningun hende na Aruba ta bisa cu e procesonan a bay manera mester ta. Si hoga den e argumentonan riba e procesonan, e ora ta perde bista riba e resultado ta pa pueblo.
E resultado di esaki ta cu na luga di ta pagando 3.4%, ta paga 6.9%. Ta mira cu e combersacion ta muda, unda partido MEP ta bisa di bay busca riba mercado internacional financiamento, mercado local por ta na 6%. Despues nan ta bay bende e 6% como un logro politico, un logro pa Aruba.
Mansur no kier pa pueblo perde for di bista e 3.4% of 3.2% ta riba mesa. Si ta paga 6% mes, esaki ta hopi mas. E gremionan comercial a bin dilanti cu esey, unda cu 6.9% e pueblo di Aruba ta bay paga 475 miyon florin extra di interes na luga di hay’e na 3.4% y esaki ta rond di 336 miyon florin. Esey ta significa 900 florin mas na cada hogar. Segun e parlamentario, tur badabada cu ta pasando den parlamento, kiermen cu otro aña e ciudadano mester duna gobierno 900 florin mas p’asina nan por cumpli cu e interes mas halto cu nan ta acordando. E 6.9% y 6% di interes no ta bon, pero loke Accion21 kier ta un interes bou di 3.4%. Mansur a enfatisa cu su persona no kier pa pueblo perde den e manipulacion y maniobra politico.
