“Na aña 2005 mi a dicidi di drenta arena politico cu e unico ilusion y meta pa traha pa duna Aruba y mi San Nicolas stima un miho futuro. E decision no tabata uno facil pa tuma, pero cu hopi curashi mi a bay p’e. Enfrentando hopi reto y hayando hopi enseñansa den e proceso, mi a mantene mi mes fiel na e ideologia pa traha na bienestar di mi pais”, asina minister Chris Romer a skirbi un rato pasa riba su pagina di Facebook.
“Awe, despues di a participa den 4 eleccion electoral consecutivo, mi tin e compromiso di anuncia cu mi ta tuma un descanso husto y necesario. Mi ta tata di 3 yiu homber cu ta den crecemento y mi kier dedica mas tempo na nan, specialmente na esun mayor cu ta bayendo Hulanda pronto. Mi kier pidi disculpa na e mas cu 1000 persona cu a deposita nan voto di confiansa den mi, como tambe na e gran cantidad di persona cu pa prome biaha a sa di demostra mi nan apoyo den e ultimo temponan aki”, asina Chris Romero a vocifera.
“E decision no ta facil pero tur cos tin su pakico y mi semper tin e siguransa cu Dios su tempo ta perfecto. Esaki no ta nifica cu mi paso den politica a yega su final, e ta simplemente un “break” pa mi dedica mas tempo na mi famia y na mi metanan personal cu a keda poni un banda pa e ultimo 7 añanan. Mi ta gradici Dios pa mi famia y amigonan incondicional, pasobra ta nan ta mi pilarnan principal den tur momento y desicion cu mi tuma”, segun minister Chris Romero.
“Danki na cada persona cu ta demostrando nan interes y preocupacion pa mi. Mi ta aprecia un mundo cada palabra di aliento y sosten. Mi no a logra contesta cada mensahe ainda y sigur mi no a logra contesta hopi yamada, pero asina cu mi haya e oportunidad cada un di boso lo tende di mi, den tur sinceridad y humildad. Danki un biaha mas! No tin palabra suficiente pa mi gradici inmensamente cada un persona cu a y ta keda dunami sosten keto bay”, asina e minister saliente a termina bisando.
Liderazgo di MEP a opta pa indirectamente laga Chris Romero afo di e lista, door di primeramente bah’e for di number tres pa seis y despues pa diesocho. Claramente el a nenga esaki debi cu tur su demas coleganan minister a bay dilanti y e ta e unico cu mester bay atras. Cu esaki ta sinti cu Evelyn Wever-Croes ta mand’e un mensahe indirecto cu, den cierto forma, no ta di acuerdo cu su maneho of su forma di traha. Cu e realidad aki riba mesa, Romero a opta pa miho e keda afo e biaha aki y lo regresa den e siguiente eleccion.
Ta obvio cu den su relato, na ningun momento e ta menciona partido MEP. Tampoco e ta gradici e partido ni liderazgo pa e añanan cu el a milita riba e lista color geel. Cu esey ta mas cu obvio cu e no ta contento cu e forma con Wever-Croes a trat’e ultimamente.
Chris Romero a participa na eleccion prome biaha na aña 2005 y den su salida caba a logra no menos di 314 voto riba su nomber. El a sigui crece na 2009 y a haya 622 voto di sosten. Siendo den parlamento, el a cuminsa haya mas popularidad y asina den e eleccion na aña 2013, ora cu e tabata # 2 riba e lista di MEP, el a haya 1273 voto riba su nomber. Por mira pues cu den cada eleccion e tabata redobla su votonan. Pero den e ultimo eleccion na september 2017, el a bay atras y a baha na 1048 voto, cu ta representa un caida di 18%.
