Meteorologo Marck Oduber a busca sosten legal cerca abogado David Kock pa loke a pasa cun’e na pia di trabao. Mientras tanto, e ta trahando bek, pero no na e departamento, sino otro caminda.
Kock a splica cu tabata tin un conflicto cu a cuminsa cu e minister concerni. Prome a mand’e riba un vakantie obligatorio. Contra esey a cuminsa cu un procedura, pero e procedura ey, no tabata tin mucho sentido, mirando cu e vakantie a cama prome cu e kortgeding a bin aden. El a djis bay traha bek, pasobra no tabata tin ningun motibo pa want’e pafo di e instituto meteorologico.
Tabata un combinacion di dos cos. Uno ta cu e deseo si tabata bon cla cu no tabata kier a tin’e mas eynan, pero door cu no por a haya ningun manera pa sak’e for di eynan, el a haya un oferta di un otro minister. Un oferta cu p’e tabata atractivo, cu ta encera cu temporalmente e lo ta bay ta na disposicion di e minister aki y tambe trahando riba un proyecto cu p’e ta parce interesante. E ora, considerando e oportunidad ey cu a dun’e, cu ta un adelanto y cu ta algo cu e kier a haci uzo di dje, el a dicidi di acepta e reto aki temporal. Formalmente, sr. Oduber ainda e ta director di Servicio Meteorologico, ta djis temporalmente no lo ta eynan y no lo fungi como tal.
Persecucion?
Segun abogado Kock, una bes cu su ter beschikking caba, en principio semper su luga di bin bek, ta Meteo. E no ta na Meteo pasobra cu na e momento aki e ta di acuerdo pa no ta na Meteo. Esey por cambia na diferente manera y riba diferente momento. En principio e ta temporalmente.
Su carera
Door cu e te beschikking aki ta temporal, e no lo afecta su carera. Door cu e ta na top di su schaal y su funcion, e no por crece mas na meteo. E ta director di Meteo. Esey no ta cambiando cu e situacion tempora cu ta bay existi na e momento aki, cual tabata un situacion cu e a bay di acuerdo cun’e. No tabata algo cu a wordo imponi pa bienestar.
Problema
Awor aki e ta cay bao di minister Rudy Lampe. E tabata un secreto publico di e conflicto cu a wordo crea y e decision eigenlijk di e gobernante tabata cu e no lo kier tin’e eynan. Esey mes probablemente a stimula e otro minister pa bin haci sr. Oduber un hopi bon oferta, pasobra cu si mira claramente, esey tabata e manera pa e no ta temporalmente mas na meteo. Door cu pe tabata un oferta atractivo, el a dicidi pa acepta esaki temporalmente.
