Mientras cu na Corsou a saca alerta di calor excesivo tur e dianan aki, toch na Aruba a opta pa no alerta pueblo pa nada, siendo cu riba nos isla tambe a raporta calor pisa. Ta casi incomprendibel cu siendo 15 minuut leu fo’i otro, cu dos Servicio Meteorologico por emiti pronosticonan asina diferente for di otro y hiba un maneho den alerta e pueblonan na un forma distinto.
Servicio Meteorologico di Aruba ta pronostica cu awe nochi shelo lo ta parcialmente nubla cu un posibel awasero breve den marduga y mañan parcialmente nubla cu un awasero breve. Temperatura maximo lo ta 35 grado Celsius y temperatura minimo 28 grado Celsius. Aki ta anuncia cu e indice di calor (heat index) den y rond di oranan di merdia lo ta di entre 36 pa 40 grado Celsius. Esey ta HOPI calor!
Meteo ta pronostica cu biento lo ta modera for di direccion entre noordoost te zuidoost; forsa 3 te 4 (12 te 30 km/ora, 7 te 16 nudo). Den dia posiblemente basta fuerte den rafaga cu forsa 5 (31 te 39 km/ora, 17 te 21 nudo).
Situacion general di tempo pa proximo 24 ora: Humedad disponibel lo combina cu e calentamiento di dia pa induci algun nubia cu lo pasa riba region local. Por spera awasero local un rato durante e proximo 24 oranan cu un chens chikito di strena cu lamper.
