Ta cu masha asombro nos a tuma nota di expresionnan di Marlon Sneek cuestionando e gobierno nobo. Mira ken! Esun cu menos por papia! Esun cu 8 anja largo a aproba cu su gobierno di AVP tabata tin 400 coordinador riba payroll.
Anto riba dje, a hasi un trabou malisimo! Esun cu 8 anja largo a aproba cu e coordinadornan aki tabata gana un salrio promedio di 9.000 florin pa luna! Esun cu pa 8 anja a stroba hobennan studia di haya trabou drechi, pasobra pa bo ta coordinador bo no mester tin ningun estudio, solamente “partij diploma”!
Awor cu e fiesta di AVP a caba y cu Aruba tin su gobierno nobo, awor Marlon Sneek kier cuestiona! Sneek unda bo a keda 8 aña largo mientras bo partido a hiba Aruba na abismo financiero? Unda Sneek tabata durante 8 aña di corupcion na gran escala, cu a condusi hasta cu un minister a bai KIA!
Marlon Sneek, abo ta e ULTIMO persona pa cuestiona hende drechi manera lider di MEP Evelyn Wever-Croes. Un gran dama cu lo no rebaha su mes pa perde tempo cu bo. Mihor cos cu Sneek mester hasi, ta sinta trankil y prepara pa e sigiente tormenta di corupcion cu lo rementa e biaha aki den Sneek su scochi. Pasobra como lider di fraccion di AVP e pregunta ta kiko e lo hasi ora e sigiente colega di dje, e biaha aki for di Parlamento, mester bandona Parlamento.
Sneek, Aruba tin un gobierno drechi, un gobierno integro. Un gobierno cu a compromete di baha gasto y lo hasie. Un partido cu a bai campaña pa baha cantidad di minister na 7, pero no a gana eleccion su so. Mester a pone awa den biña, pasobra e ta mihor pa Aruba.
