Awe mainta a tuma luga un reunion publico na parlamento den cual a trata e ancramento di e ley di ombudsman. Resultado di esaki tabata cu no a logra obtene dos tercio di e voto na fabor pa realisa esaki, pues diesun a vota na fabor y dies a vota den contra.
Parlamentario Hendrik Tevreden, di fraccion MEP, a bisa cu ta un lastima con e reunion a cana ya cu esaki ta un ley asina importante cu a cuminsa trata como concepto ya for di 2005 caba.
Den e transcurso di e añanan, a ley aki a permanece un punto vital pa nos comunidad, segun Tevreden. “Nos sa e casonan social cu tin, nos sa e problemama social cu tin, problema di abuso, hende cu ta falta un defensor na nan banda”, el a bisa, añadiendo cu awe por a culmina e ley aki cu ya a pasa na aña 2020 caba, pero cu awe mester a ancr’e den nos constitucion p’asina busca e persona adecua, un persona sin ningun conexion politico. Sinembargo, oposicion a tranca e procedura aki, segun Tevreden.
Na su turno, parlamentario Marco Berlis (MEP) tambe a bisa cu e ta lamenta cu no a logra ancra e ley aki den nos constitucion y tambe a recorda cu na 2020 caba e ley aki a pasa unanimemente y cu Aruba ta e unico den region cu ta propone pa tin dos tercio di voto ya cu tur otro caminda den Reino, e mayoria caba ta aproba esaki.
Asina el a sigui splica cu tabatin un total di diesnuebe reunion di comision pa esaki y cu oposicion nunca a trece nada pa dilanti of participa y awe dirpiente a trece shete amienda. Tur esaki, segun Berlis, pa “nan kier trata di ficha tur e cos aki riba partido politico, hungando un wega politico, pero mi ta kere nos tin cu wak ‘the bigger picture’.
Pa un relato mas amplio lesa edicion di TREMPAN.
