Siman pasa durante di un conferencia di prensa, Minister di Transporte, Chris Romero a ‘subraya’ cu pa ‘añanan largo tin problemanan grandi cu ta surgi rond di e isla, ora cu ta trata di transporte publico.’
Vocero di partido AVP, sr Melvin Tromp ta señala cu Minister Romero a mustra cu el a constata cu no tin ningun tipo di structura den DTP, caminda ta haci palabracionnan verbal pero cu nunca esakinan a wordo concretisa den ley y cu no tabatin control adecua.
Na mes momento e minister a papia di e problema di taxistanan pirata cu nunca a haya un solucion pa falta di atencion cu a duna esaki.
“Ta remarcabel si pa scucha e declaracionnan aki, ya cu maneho di transporte publico pa 7 aña largo, a cay bou responsabilidad di e actual colega di Minister Romero, esta Minister Oduber kende tabata encarga cu e cartera di transporte publico den gabinete Mike Eman I y II.
Minister Romero ta papia di a bishita departameto di DIP pa pone su mes na altura pero lo tabata na su luga pa e tene un reunion cu su colega di infrastructura pa e por haya ‘first hand’ kico su colega a haci tur e tempo ey.
Na mes momento nos tin cu aplaudi tambe e declaracion haci pa Minister Romero cu su deseo di trece solucion berdadero pa cunukeronan entre otro en cooperacion cu WEB Aruba NV riba un prijs di awa mas aceptabel pa esunnan cu ta planta.
Esaki ta un continuacion na mes momento di e vision di ex Prome Minister Mike Eman kende tambe a cuminsa traha riba esaki despues cu e actual Minister Oduber a bandona gobierno y partido AVP.
Sinembargo aki tambe ta bon pa mustra cu ta di dos departamento cu tabata surti bou encargo di e actual colega di Romero, Minister Oduber, kende tabata encarga cu cunukeronan tambe.
Den cierto forma tin cu interpreta e plan di Minister Romero como un mocion di incapacidad dirigi na su colega minister actual, kende den ambos caso tabatin suficiente tempo pa atende cu esakinan y evita tur e problemanan cu su persona ta confrontando na e momentonan aki cu su ministerio,” Melvin Tromp a mustra.
