Melvin Tromp, vocero di e Fraccion di AVP a bolbe haye cu evidencia con e gobierno actual di Evelyn Wever-Croes hunto cu su coleganan Ministro ta opta pa sigui cu nan racha di persigui hende y awor a toca e miembro nan di Fundacion Facilidadnan Deportivo
Melvin Tromp (AVP) ta hopi asombra pa e forma cu e gobierno aki ta destruiendo famianan mientras cu su lider ta papia cu pa su persona e ser humano ta keda central pasobra ta incomprendible con e Ministro encarga cu deporte y salubridad ta haya ta bon pa busca moda pa core cu hendenan cu amplio experiencia ariba tereno di deporte y facilidadnan, e pregunta ta ta cu ki intención ta haci esaki y pa buta ken den e posicionan aki.
Melvin Tromp ta bisa cu ta parce cu e Ministro aki ta mal bruha of di berdad no ta comprende kiko ta su encargo pasobra un figura manera Rolly Bislip cu a marca su nomber ariba e mapa mundialmente dor di dedica asina hopi aña den deporte y cu a yuda forma hopi deportista di talla y más ainda un homber cu un trajectoria cu a landra di venezuela pa aruba y tambe na Inglatera awe tambe ta uno cu e Ministro Dangui Oduber kier deshaci di su persona como miembro di directiva di FFD.
Melvin Tromp ta bisa cu aparentemente e gobernantenan aki no ta siña nan les y no ta respeta nada y ta puntra ta ken lo ta su consehero paso te hasta den corte di Husticia durante e caso di e miembronan di junta di Fundacion Lotto Pa Deporte huez a haci un remarca hopi interesante cu BOSO MESTER STOP DI PERSIGUI HENDE un pensamento cu Sr Tromp ta bisa cu e ta na su lugar.
Mientras tanto Melvin Tromp ta bisa cu informacionan palpable ta mustra cu tin un interés enorme di esnan den MEP pa nan por bolbe bay hiba FLPD bao di nan poder. E persona cu a haya un nomber den boca di pueblo e PIRAÑA di Lotto Pa Deporte cu a sa di haci y deshaci cu placa di FLPD y awe e mesun sinberguenza aki ta mustra hopi interés pa papia y compara su maneho y e maneho actual. Melvin Tromp ta sugeri pa manda pidi cifra kiko ta e retorno den FLPD bao di e maneho aki compara cu actonan di malversación financiero bao di e PIRAÑA aki su maneho
Pa conclui e vocero di e Fraccion di AVP Melvin Tromp ta bisa cu e Minister di Deporte y Salubridad mester ta más atento pasobra na final ta e ta esun cu ta bin dilanti y cuestiona bobedad y kier laga su mes worde huza pa esnan cu hopi interés pa por inicia cu nan fechoria den locual cu ta FLPD y tambe awor den FFD.
Melvin Tromp te hasta ta bisa cu Ministro Danqui Oduber mester tuma curashi y sinta na mesa cu e fundacionan aki y laga nan mustra su persona e diferencia kiko ta e valor agrega pa tin hendenan profesional compara cu hendenan cu un solo meta pa yega na e placa pa historia por ripiti su mes. Melvin Tromp ta bisa na final cu berdad nunca a perhudica niun hende pues no haci bo mes ridiculo pa interés di otro cu mal intención.
