Camara di Comercio ta mira e situacion di Aruba cu preocupacion, principalmente pa comercio cu mester percura pa economia draai. P’esey nan ta di acuerdo cu algun medida cu Gobierno a bini cu ne ora cu a surgi e di dos ola di brote di coronavirus. Den combersacion cu voceronan di KVK Satish Daryanani (Presidente); Omar Tromp (Vice Presidente) y Martijn Balkestijn (Director) a bini dilanti e nificacion di e subsidio cu Gobierno ta dunando aworaki, cu ayudo di Hulanda.
Aruba ta depende di su economia y e economia ta depende aworaki con e di dos ola di coronavirus desaroya y atende cu ne.
“Di dos lockdown lo ta funesto pa hopi compania, y mas ainda si stop cu e subsidio di salario,” Omar Tromp a bisa. E lo trece hopi compania den problema.Ta normal na tur parti di mundo cu ora un negoshi no ta logra wanta cabes riba awa, ta haya nan mes obliga di cera nan portanan, segun Daryanani. E consecuencia directo ta un presion pa e seguridad social di un pais.
SI e comerciante no logra di cambia su estilo di haci negoshi of baha su gastonan, e economia lo “schrin” y cu ne un grupo di comerciante. Aworaki tin 1700 compania cu ta hayando subsidio di salario pa 27 mil empleado. E ta demostra cu un grupo grandi caba mester di ayudo y a haya un reduccion den nan gastonan. E reserva di mayoria compania a bay caba. Awo nan ta sigui bou operacion cu ayudo pa gasto di salario, pero tin otro gastonan cu tin di cumpli cu nan.
Turismo tampoco ta bay trece suficiente placa pa e economia draai sin suficiente entrada di exterior, segun Balkestijn.
Mirando e situacion reinante awo, KVK ta apoya e maneho di Gobierno pa implementa e uzo obligatorio di mask, cuarentena, etc. Toque de Queda no a bini ainda mirando cu a cera discoteca y barnan. No ta kere aworaki den un Shelter in Place tampoco, pasobra esey tambe lo ta funesto pa Gobierno. Lo para economia pa gran parti. E test masivo tumando luga awo, lo señala mayoria di e casonan positivo hopi lihe, pone nan den cuarentena (isolacion). Tur esaki ta yuda evita pa bay den shelter in place. “Loke Gobierno ta haciendo ta mustrando bon,” Tromp a bisa.
