E reintroduccion di AruParking ta parce mesun bruha cu un bol di hilo, pero cu sin e punta. Na prome instante, Minister Ursell Arends encarga cu transporte publico a informa cu lo cuminsa cobra bek pa parkeer den centro di ciudad. E lo reintroduci AruParking. E minister a sali manera un pistool sin bala, den e prome fase a informa cu lo tin klem bek pero despues cu el a ricibi un scual di su coleganan (MEP) den conseho di minister, a core dal un stap patras y elimina e pensamento cu klem ta bolbe, mas aun pa e color geel.
No a dura mucho cu pocopoco e erornan di AruParking a cuminsa bin mas y mas dilanti. A informa cu lo cobra un florin pa parkeer 30 minuut y dos florin pa un ora. E prome siman di e reintroduccion di AruParking no a bay den su miho forma. Apesar cu tin solamente cinco personal pa controla henter centro di ciudad, hasta a cuminsa lanta e sentimento cu AruParking ta hortando pueblo. Si, asina mes, horta. Riba un pleno “Super Saturday” cu ta supone di tin movecion den caya, e oficina ta cera y no tin control den henter centro di ciudad. Pues, manera e minister mes a bisa; e operacion di AruParking ta di dialuna pa diasabra. Pero riba diasabra, ningun hende ta controla pa ta exigi pa bo paga pa parkeer si.
Ora yega e momento di paga, tambe t’un monton di cos fout. Apart cu e mashin no ta “user friendly”, e ta horta bo tambe!. Ora bo scoge pa paga cu bo carchi di banco, e ta duna bo simbolo di DOLLAR($). Pues casi sigur bo ta kere cu e ta cobra bo na dollar. Pero pa kita e duda aki, algun dia pasa Minister Ursell Arends a confirma den un entrevista cu 24ora.com, cu e mashin no lo cobra bo na dollar sino na florin.
No a dura mucho cu por a comproba cu locual e minister a bisa, no ta cuadra cu realidad. Ora bo scoge, e opcion pa un ora cual ta dos florin, bo ta paga cu bo carch’i banco y despues ricibi como sorpresa cu e mashin a cobra bo AWG 3,60 en bes di AWG 2.00. Pues, e mashin a cobra bo $2,( $2 X 1.80 = AWG 3.60).
Ta spera cu pronto por mira mehoracion den AruParking y reintroducie di un manera cu pueblo tin confiansa den dje y no manera e ta na e momentonan aki, cu hasta ta horta bo algun florin.
