Durante un entrevista duna na Enfoke, parlamentario y lider di partido MAS drs. Marisol Lopez-Tromp a reaccion riba e ultimo desaroyo politico. Teniendo na cuenta cu partido MEP a anuncia comienso di campaña electoral, Lopez-Tromp a declara cu “como politico semper bo mester ta cla pa kico cu bin”. Adicionalmente a señala cu, mescos tabata e caso na 2021, su partido no lo haci uzo di sticker y bandera pasobra, entre otro, ta existi un miedo den comunidad a raiz di con persecusion politico a lanta cabes durante e ultimo gobernacionnan.
Lopez-Tromp a indica cu no ta solamente pa campaña, pero tambe tin biaha gobierno ta cay y hopi otro cos por pasa cu ta pone e panorama politico cambia.
Asina mes, e mester a remarca cu pa anuncia di tres aña adelanta, lo ta un record si un gobierno a wanta un aña so, refiriendo na e ultimo acontecimentonan den coalicion MEP-RAIZ cu ta forma Gabinete Wever-Croes II.
“Y pa loke ta MAS, e ultimo eleccion a haya dos asiento, nos tin un representacion digno den Parlamento pa haci e trabou cu pueblo a scoge nos p’e y nos lo keda hacie con largo cu e periodo dura y naturalmente bishitando cas. Nos no ta un partido cu ta saca bandera cu borchi, ni haci buya. Mi ta kere un aspecto cu ta hunga un rol hopi grandi den nos comunidad, ta persecusion politico,” asina e politico a indica.
Pa e relato completo, lesa edicion di TREMPAN
