Diahuebs a tuma luga un reunion publico den parlamento (Openbare Vergadering of OV) caminda nan mester a ancra e ley di Ombudsman den constitucion. Tabatin 7 punto, echo cu e parlamentarionan no por a yega na otro.
Segun lider di fraccion di partido MAS, Marisol Lopez-Tromp, no a aproba e cambio grandi proponi pa gobierno. Loke oposicion y sigur partido MAS a trece padilanti ta cu ta importante pa pueblo sa cu a aproba e ley di ombudsman varios aña atras, pues e t’ey.
Loke a trata diahuebs ta pa ancra e instituto ombudsman den constitucion. Na un pais manera Hulanda, ya nan a introduci ombudsman sin cu e tabata ancra den constitucion. Loke cu prome minister a bisa cu no mester di e cambio di ley pa por introduci un ombudsman. Si esey tabata berdad, e por a bin masha aña caba, segun Lopez-Tromp.
Los di esey, importante ta pa bisa ken, como profesional, ta bay acepta un reto manera esaki pa bira un ombudsman caminda tur dia ta bay pone dede riba e herida cu tin den gobernacion, inhusticia cu ta sosode, maltrato, procedura robes, corupto y malo. Cua ombudsman ta bay investiga, sabiendo cu e ta core peliger cu su trabao, caminda cu ora e haci esaki, un mayoria di 11 den parlamento cu ta obedece gobierno, ta djis kit’e. E sa cu den un aña e por ta riba caya.
Awo ta ken ta bay haci esey. “Nos kier un ombudsman cu ta sintie cu e por tin continuidad y haci su trabao cu tur trankilidad, sin cu e ta core e riesgo, sin cu e ta core e peliger, cu na momento cu e bay trece dilanti, aspecto cu tin cu mehora, cu ta haci dolor, inhusticia den diferente departamento, pueblo cu ta rabia cu cierto servicio, investigacion cu tin cu tuma luga, p’e no tin ningun miedo cu e ta core e mesun destino, caminda cu por retir’e,” Lopez-Tromp a bisa enfaticamente.
Loke a presenta den parlamento diahuebs, caminda 11 di e miembronan di coalicion, no a sostene e amiendanan cu ta importante pa drecha e ley aki, pa hacie mas miho y fuerte, pa Lopez-Tromp, ta algo incomprendibel. Nan mes sa tambe bon kico e ta, ora cu e funcion ta core peliger.
Pa cobertura mas amplio lesa TREMPAN.
