Por a mira e organisacion di pensionado OPPA como tambe gremio comercial ATIA ta preocupa pa loke t’e desaroyonan. Ta sinti un incertidumbre riba locual t’e tarifa di awa y coriente, no por djis keda sin atendi.
Segun minister di Asuntonan Economico, Desaroyo sostenibel y Comunicacion, mr. Geoffrey Wever, a splica cu esaki ta den su bista. Manera cu el a yega di menciona algun dia pasa, a haya un proposicion oficial como minister encarga cu e tarifanan. Pero a dirigi esaki na Minister Glenbert Croes, di energia hunto cu ne. A laga e expertonan traha riba esaki y evalua esaki, duna e ministernan conseho. Basa riba esaki a sali un carta den consulta estrecho cu Minister Croes pa Elmar.
Minister Wever a mira diahuebs atardi un reaccion di parti di Elmar, pero no sa su contenido ainda. Di parti di gobierno, a haci e ‘due diligence’ pa por tuma un decision husto y prudente y a manda e peticion como gobierno bek p’e empresanan estatal y ta wardando e ora pa nan manda nan contraproposicion, nan ahustacion, di e proposicion cu nan a haci na gobierno di Aruba.
Minister Wever a indica cu ta den consulta regular cu Minister Croes. E parti energetico ta importante p’e mandatario, pasobra e tin impacto riba full economia. Diahuebs mes, Wever y Minister Croes tabata di bishita na RDA, unda cu a haya un recorido di e tereno di e refineria, unda cu a mustr’e un infrastructura, unda cu ta importa gasolin, diesel, HFO, mustra kico t’e estado di e infrastructura, inversion cu tin di tuma luga, p’asina garantisa e distribucion energetico di e pais. Tur esaki ta tuma luga den consulta estrecho cu Minister Glenbert Croes.
Despues di esey nan a haya un presentacion na oficina di RDA, caminda cu a duna nan diferente detaye cu ta importante p’e cartera di economia y energia. P’asina hunto percura pa garantisa e stabilidad energetico y economico di nos pais.
POSIBEL FECHA
Segun Minister Wever, e termino cu a duna e empresa estatal ta cinco dia, desde e momento cu a manda e carta, esta diamars mainta. Esey ta nifica cu pa principio di otro siman. Posiblemente ya den curso di diabierna lo por tin un claridad. Mester consulta cu Minister Croes y e conseheronan pa asisti nan p’asina tuma e decision na bienestar di tur ciudadano di pais Aruba.
SOCIALE VANGNET
Un pregunta cu OPPA a haci ta e sociale vangnet y si ta algo cu ta poniendo den mira tambe, si lo bay introduci esaki ya cu e ta algo di Minister Croes mes. Como Minister di Economia, Wever a indica cu a mira e comunicado di OPPA. Minister Croes y Minister Wever ta den consulta riba e topico aki. Ta tuma den consideracion tur aspecto cu ta relevante p’e ciudadanonan pero tambe pa comercio, mirando cu tin di haber cu prijs. Como pais, mester mira cu e interes mester ta mas amplio. No mester mira un grupo so, sino full e comunidad. Hopi biaha ta haci esey door di papia cu otro, papia cu e expertonan prome cu tuma un decision.
