Miembro di fraccion di MAS, parlamentario Aquannette Gunn, tabat’ey presente durante e reunion cu e gremionan pa loke ta nan preocupacion di e implementacion di BBO na frontera.
Gunn a indica cu na momento cu Vice-Presidente di Parlamento, Raymond Kamperveen a habri e reunion, fraccion di MAS a pidi un punto di ordo y a indica cu e fraccion a haci un peticion p’asina por tin un encuentro publico cu e gremionan p’asina cada un di e gremionan por a informa pueblo tocante di nan preocupacion y tambe kico ta tur e recomendacionnan, cu e poco espacio cu nan por a haya di gobierno.
Pero den e caso aki lamentablemente e Vice-Presidente Kamperveen a indica cu lo a sinta den un ambito cera.
E parlamentario a indica cu el a haci e pregunta despues cu “ki garantia nos como parlamento tin cu berdaderamente lo yama un reunion publico.”
Na fin di dia ta importante pa pueblo ta na altura kico tur esaki lo bay nifica pa pais Aruba cu finalmente, tanto comercio como consumidor lo bay sufri grandemente cu e decision.
Si scucha e declaracionnan haci p’e minister di finansa, ya caba ta sigur cu e ley aki lo pasa.
Gunn a indica cu e unico persona cu ta forma parti di coalicion, cual t’e Vice-Presidente Kamperveen, a haci dos pregunta na e expertonan presente. Locual t’e dos personanan cu tabata presente, cu ta representa e fraccion di MEP, tabata keto keto.
Gunn a haci un peticion n’e dos parlamentarionan aki, masha amabel y profundo, den caracter di nan como parlamentario, pa nan analisa detayadamente kico e ley aki lo nifica pa pais Aruba y pa nan vota n’e bienestar general di tur esunnan cu ta biba aki na Aruba y mas ainda tambe, teniendo cuenta, e impacto cu esaki lo tin riba e turismo, cu ta nos pilar economico.
Por ultimo e parlamentario a indica cu BBO na frontera por trece efecto negativo pa nos turismo, tanto directo como indirecto.
