Ta trata aki di un grupo di hoben cu desde tres aña pasa a cuminsa cu un proyecto cu a haya e nomber di Santa’s Cause. For di october caba a pidi esunnan interesa pa pasa laga un regalo pa mucha entre 35 y 50 florin na varios negoshi, pa asina por acumula nan tur. E meta tabata pa yuda mas of menos 200 mucha pero awe a surpasa 400 regalo pa cual hopi mas mucha a haya un regalo.
Separa di un regalo, durante e evento awe na Sabana Basora, a percura pa Santa Claus mes tabata presente pa entrega e regalonan, hunto cu snacks, bolo, co’i bebe y varios sorpresa mas pa e muchanan. Di e forma aki e muchanan menos afortuna a logra pone un sonrisa grandi riba nan cara, a pasa un rato agradabel y a bay cas cu regalo bou brasa.
Pa e organisacion, e hecho cu a logra haya asina tanto cooperacion, asina hopi donacion y sosten di comercio y publico general memey di e pandemia, ta yena nan cu masha orguyo y satisfaccion.
