Banco Central di Aruba (BCA) recientemente a conclui e encuesta di percepcion di negoshi pa e promer trimester di 2020. Den su formato digital mas amplio, e encuesta digital tambe a evalua e impacto causa pa e pandemia di COVID-19 riba condicionnan economico y actividadnan di negoshi.
E asina yama ‘Business Perception Index’, cu ta consisti di e indicenan di condicionnan economico actual y condicionnan economico a corto plaso, a baha cu 5,5 punto di porcentahe te na 91,9 durante e promer trimester di 2020. E ‘Business Perception Index’ total ta indica un deterioro significante den e confiansa di negoshinan, y ta e caida mas grandi registra desde introduccion di e ‘Business Perception Survey’ den 2002 (Grafiek 1)[1].
[1] E indice por varia entre 90 y 110. Entre 90 y 100, e indice ta mustra un situacion di pesimismo. Un indice di exactamente 100 ta indica cu negoshinan no ta ni optimista, tampoco pesimista, pero ta neutral den nan pensamento di desaroyo economico na Aruba. Entre 100 y 110, e indice ta mustra un situacion di optimismo den pensamento di negoshinan. E indice di condicionnan economico actual a baha cu 5,1 punto di porcentahe te na 93,3 compara cu 98,4 den e di cuater trimester di 2019. E indice di condicionnan economico a corto plaso a registra un bahada di 5,2 punto di porcentahe, esta for di 96,0 den e di cuater trimester di 2019 te na 90,8 den e promer trimester di 2020
(Tabel 1). Den e siguiente 12 lunanan, e percentahe di negoshinan den e encuesta cu ta premira un crecemento economico negativo a aumenta cu 56,3 punto di porcentahe te na 88,4 porciento.
Pa locual ta e impacto causa door di e pandemia COVID-19, BCA a amplia e encuesta di percepcion di negoshi, pa asina tambe evalua e impacto ariba benta di negoshinan, necesidad pa fondonan di emergencia y e resultado di e impacto economico.
Mas cu 50 porciento di e negoshinan den e encuesta a indica cu COVID-19 a impacta e benta di nan negoshi bastante. Casi 40 porciento ta premira cu e impacto causa door di e pandemia COVID-19 lo dura mas cu 12 luna. Tambe, un tercera parti (32,6 porciento) di e negoshinan den e encuesta a raporta cu nan tin intencion pa aplica pa e fondo di emergencia brinda door di Gobierno di Aruba. E informe completo di e encuesta di percepcion di negoshi ta disponibel riba website di BCA (https://www.cbaruba.org/).
