Diaranson atardi, presenciando un bahada di solo espectacular, mas di 200 pareha a renoba nan promesa di matrimonio riba Eagle Beach. Sigur un bista unico pa esunnan cu a pasa den cercania pa mira asina tanto hende hura na otro un biaha mas, nan promesa di amor, fidelidad, compañeriso, te na fin.
Tabatin pareha no solamente turista, pero localnan tambe por a inscribi y renoba nan promesa. E pareha di mas nobo casa cu a atende e evento special aki tabatin un dia y mey casa y esun di mas largo, tin e aniversario respeta di 60 aña casa.
Lissy Lampe, Wedding Planner y coordinator pa su propio compania Ceremonies & Celebrations in Aruba, a comenta cu e evento aki sigur sigur tabata un exito completo. Segun su calculo, nan a pasa e cantidad di 200, cu a scoge Aruba pa renoba nan promesa.
Pa atrae e parehanan
Segun Lissy Lampe, e tabata hopi facil pa esun cu kier a registra via e website di ATA, pues e tabata accesibel pa tur hende, sea bo ta local of no. Tabatin pareha di tur parti di mundo, specialmente di Merca, di Italia y di otro paisnan. Ta algo facil cu bo mes por a haci, esta registra, pa sa cuanto hende ta bin. Te cu diamars tabata tin 186 pareha registra y diaranson mainta el a surpasa 200.
E evento
Mas of menos mita di e parehanan a planea nan vakantie rond di e dia aki, ora cu a anuncia e evento for di aña pasa November riba rednan social.
Tabatin casi 100 pareha registra te cu 2 pa 3 siman pasa. E ultimo 100+ a registra den e ultimo tres simannan aki.
Di dos biaha
Esaki ta e di dos biaha cu ta haci’e. Aña pasa tabatin mas of menos 160 pareha. A shoot pa 100, pasobra ta prome biaha y no sa con el a bay. E biaha aki a shoot pa 200 y no a haci e conteo ainda, pero ta sigur cu a yega 240 pareha.
Aporte na turismo
Esaki ta algo cu sigur nan lo haci pa futuro. E return of investment ta minimo dies biaha. Si mira cu diaranson mainta, pa motibo di e renobacion di promesa aki, Aruba a haya un cobertura tremendo riba HNL, cual ta canal 30, cual ta duna noticia henter dia. Diaranson mainta tabata tin 3 pa 4 segmento dedica solamente na Aruba. Hendenan di tur parti di mundo por a wak esey. Ta algo cu ta impagabel, segun Lampe.
Tambe parti atardi tabata tin hende di varios bridal magazines tambe, cu ta usando esaki pa promove Aruba den nan medionan.
Plan pa futuro
Te ainda e idea ta pa planea un evento asina pa otro aña. Awo ATA tin cu prepara nan rapport y e ora pa ATA caba di dicidi si ta haci e evento aki si of no.
Su retonan
No ta nada facil pa haci un evento asina, pasobra ta mas cu 200 pareha biaha dos, plus famia y amigonan. Si cada un pareha bin cu algun hende, bo tin practicamente un miniconcierto riba beach. Segun Lampe e ta un reto. A cuminsa na November, kico lo bay haci, bay pone y trece tur e actornan hunto, pa sinta y haci tur e logistical planning. Por wak atras na un evento sumamente exitoso, pasobra cu tur hende cu a subi bus bek ora di bay, tabata sumamente satisfecho y tur a bin duna pabien y danki pa un evento cu a surpasa nan expectativanan.
